25.05.2026 | 12:29
«Խոսակցությունները չեն համապատասխանում իրականությանը»․ ԿԳՄՍ-ն՝ Արտամետի Գուրգեն Մարգարյանի անվան դպրոցի փակման մասին
Կրեմլը մանրամասներ է հայտնել Թրամփի բանագնացի և Պուտինի հանդիպումից
Քաղաքականություն
14.03.2025 | 14:39
ՌԴ նախագահ Վլադիմիր Պուտինը մարտի 13-ի ուշ երեկոյան Կրեմլում ընդունել է ԱՄՆ նախագահի հատուկ բանագնաց Սթիվ Ուիթկոֆին։ Այս մասին հայտնել է ՌԴ նախագահի մամուլի քարտուղար Դմիտրի Պեսկովը, գրում է Ինտերֆաքսը։
Նա նշել է, որ Պուտինը հատուկ բանագնացի միջոցով տեղեկատվություն ու լրացուցիչ ազդանշաններ է փոխանցել ԱՄՆ նախագահ Դոնալդ Թրամփին։
«Նա երեկ այստեղ էր, ուշ երեկոյան նրան արդեն ընդունել է նախագահ Պուտինը: Ռուսական կողմին ներկայացվել է լրացուցիչ տեղեկատվություն, նաև Ուիթկոֆի միջոցով Պուտինը տեղեկատվություն և լրացուցիչ ազդանշաններ է փոխանցել նախագահ Թրամփին»,- լրագրողներին ասել է Պեսկովը։
Նա հավելել է, որ երկու կողմից էլ կա ըմբռնում, որ Պուտինի և Թրամփի միջև զրույցն անհրաժեշտ է։ Այն, ըստ Կրեմլի մամուլի քարտուղարի, տեղի կունենա Ուիթկոֆի՝ հանդիպման մասին Թրամփին զեկուցելուց հետո։ Նա կոնկրետ ժամկետներ չի նշել։
Պեսկովը նաև նշել է, որ «զգուշավոր լավատեսության հիմքեր կան» Ուկրաինայում հրադադարի շուրջ բանակցությունների վերաբերյալ։ Նրա խոսքով՝ Պուտինն աջակցում է Թրամփի դիրքորոշմանը «հակամարտությունը կարգավորելու առումով», սակայն «նա բարձրաձայնել է որոշ հարցեր, որոնց պատասխանները պետք է միասին փնտրել», և «շատ անելիքներ են մնում»։
Հիշեցնենք, որ ավելի վաղ լրատվամիջոցները հայտնել էին, որ Թրամփի հատուկ բանագնացը հեռացել է Մոսկվայից, նրա օդանավը վայրէջք է կատարել Բաքվում։
Թարգմանությունը՝ Էմմա Չոբանյանի
