Հայաստանի խիզախ զիջումները հնարավոր են դարձնում այս վերջին քայլը․ Ֆրանսիան, Գերմանիան և Իսպանիան ողջունել են ՀՀ-ի և Ադրբեջանի միջև բանակցությունների ավարտը

ԵՄ մի շարք երկրների արտաքին քաղաքական գերատեսչություններ ողջունել են Հայաստանի և Ադրեջանի միջև խաղաղության պայմանագրի տեքստի շուրջ բանակցությունների ավարտի մասին հայտարարությունը։

«Ֆրանսիան ողջունում է Հայաստանի և Ադրբեջանի միջև խաղաղության պայմանագրի շուրջ բանակցությունների հաջող ավարտի մասին հայտարարությունը։ Ֆրանսիան հույս է հայտնում, որ պայմանագիրը կստրորագրվի սեղմ ժամկետներում»,-ասվում է Ֆրանսիայի ԱԳՆ հայտարարության մեջ։

Միաժամանակ, Փարիզը նշում է, որ Հայաստանի և Ադրբեջանի միջև հարաբերությունների կարգավորումը՝ երկու պետությունների տարածքային ամբողջականության ու ինքնիշխանության հարգմամբ, պետք է Հարավային Կովկասին հնարավորություն ընձեռի դառնալ խաղաղության, ինտեգրման և համագործակցության գոտի բաց սահմաններով՝ ի շահ տարածաշրջանի բնակչության։

Գերմանիայի ԱԳ նախարար Անալենա Բերբոքն էլ հայտարարել է, որ Հայաստանի և Ադրբեջանի միջև խաղաղության պայմանագրի շուրջ համաձայնության հասնելու մասին լուրերը հույս են ներշնչում։ Ըստ նրա՝ տասնամյակների թշնամությունից և պատերազմից հետո փաստը, որ կայուն խաղաղությունն այժմ հասանելի է, կարևոր է տարածաշրջանի համար և նրա սահմաններից դուրս:

«Երկար բանակցություններից հետո Հայաստանի խիզախ զիջումները հնարավոր են դարձնում այս վերջին քայլը ճանապարհին, որի ընթացքում մենք ուղեկցել ենք երկու երկրներին: Կոչ եմ անում երկու կողմերին այժմ ստորագրել խաղաղության պայմանագիրը»,- ասել է Բերբոքը։

Մադրիդը ևս ողջունել է բանակցությունների ավարտի մասին հայտարարությունը։

«Իսպանիան ողջունում է Հայաստանի Հանրապետության և Ադրբեջանական Հանրապետության միջև համաձայնագրի լուրը և հույս ունի, որ այս հայտարարությունը կհանգեցնի երկու երկրների միջև վերջնական համաձայնագրի կնքմանը։ Իսպանիան վերահաստատում է իր հանձնառությունը Հարավային Կովկասում խաղաղությանն ու կայունությանը»,- ասվում է Իսպանիայի ԱԳՆ-ի հայտարարությունում։

Թարգմանությունը՝ Էմմա Չոբանյանի