Դրանք անլուծելի հարցեր են, որոնց շուրջ հակասությունները վաղ թե ուշ վերականգնվելու են․ Բորիս Նավասարդյան

«Ես ո՛չ համաձայն եմ դիտորդների հեռացմանը, ո՛չ էլ հայցերը հետ կանչելուն, դրանք անլուծելի հարցեր են և վաղ թե ուշ դրանց շուրջ հակասությունները վերականգնվելու են», – Factor.am-ի հետ զրույցում խաղաղության համաձայնագրի երկու չհամաձայնեցված կետերի շուրջ Հայաստանի կողմից Ադրբեջանի առաջարկներն ընդունելու հարցին ի պատասխան նման կարծիք է հայտնում Երևանի մամուլի ակումբի պատվավոր նախագահ, քաղաքական վերլուծաբան Բորիս Նավասարդյանը։

Նրա խոսքով՝ այն երկու կետերը, որոնց շուրջ հակասությունները պահպանվում էին Երևանի և Բաքվի միջև, պետք է ընդհանրապես խաղաղության համաձայնագրում չլինեին։ Սակայն ըստ Նավասարդյանի՝ եթե այս հայտարարությունը խաղաղության գործընթացի սկիզբ դնի, ապա այն դրական քայլ կարելի է համարել։

«Այդ կետերը նաև, իմ կարծիքով, կարևոր չեն բուն համաձայնագրի համար, և այդ դեպքում կարելի է ձևացնել, որ դրանց շուրջ կա համաձայնություն։ Իրականում համաձայնության հասնելը և այդ և այլ կետերի շուրջ, որոնք դուրս են մնացել համաձայնության տեքստի նախագծից, դրանք կարճ ժամանակում և միայն համաձայնագրի տեքստը ստորագրելով չեն լուծվում», – նշում է Նավասարդյանը։

Հիշեցնենք, որ Ադրբեջանի արտաքին գործերի նախարար Ջեյհուն Բայրամովն այսօր հայտարարել էր, որ Ադրբեջանն ու Հայաստանն ավարտել են տեքստի համաձայնեցման շուրջ բանակցությունները։ Բայրամովը շեշտել է՝ Հայաստանն ընդունել է պայմանագրի չհամաձայնեցված վերջին երկու կետերի վերաբերյալ ադրբեջանական կողմի առաջարկը։

Ավելի ուշ Հայաստանի Արտաքին գործերի նախարարությունը հաստատեց, որ Հայաստանն ընդունում է «Հայաստանի Հանրապետության և Ադրբեջանական Հանրապետության միջև խաղաղության և միջպետական հարաբերությունների հաստատման մասին համաձայնագրի» նախագծի չհամաձայնեցված երկու հոդվածների վերաբերյալ Ադրբեջանի առաջարկությունները։ Արտաքին գերատեսչությունից հայտնում են, որ փաստաթուղթը պատրաստ է ստորագրման և Հայաստանը պատրաստ է Ադրբեջանի հետ սկսել խորհրդակցություններ Համաձայնագրի ստորագրման ժամկետների և տեղի շուրջ։

Անի Թամրազյան