Արփինե Սարգսյանը` Խաչատուր Սուքիասյանի և Արթուր Վանեցյանի թիկնապահներին բերման ենթարկելու մասին․ ՏԵՍԱՆՅՈՒԹ

Կառավարության նիստից հետո լրագրողների հետ զրույցում Ներքին գործերի նախարար Արփինե Սարգսյանը նշեց, որ նախարարությունը նպատակ ունի հասկանալու՝ զենքով կատարված հանցագործությունները հիմնականում օրինակա՞ն, թե՞ անօրինական զենքերով են տեղի ունենում։

«Վիճակագրական նախնական տվյալները ցույց են տալիս, որ այն միֆը, թե հրազենով կատարված հանցագործությունները հիմնականում անօրինական զենքերով են իրականացվում, այլևս գոյություն չունի։ Մեր տվյալներով՝ շատ են այնպիսի հանցանքները, որոնք օրինական զենքերով են կատարվում»,- ասաց նախարարը՝ անդրադառնալով այն հարցին, թե ինչու քաղաքացիները պետք է հանձնեն որպես պարգևատրում ստացած զենքերը։

Նախարարը հիշեցրեց, որ «Զենքի շրջանառության կարգավորման մասին» օրենքի ընդունումից հետո մոնիտորինգ է իրականացվում՝ հասկանալու, թե օրենքում ինչպիսի փոփոխությունների անհրաժեշտություն կա։

«Թեև գործող օրենքը նախատեսում է որոշակի նոր կարգավորումներ պարգևատրված զենքերի մասով, սակայն այս նպատակն ամբողջությամբ իրացված չէ»,- նշեց Սարգսյանը։

Նախարարն անդրադարձավ նաև նախօրեին ԱԺ ՔՊ խմբակցության պատգամավոր Խաչատուր Սուքիասյանի և ԱԱԾ նախկին տնօրեն Արթուր Վանեցյանի թիկնապահներին բերման ենթարկելուն։

«Ոստիկանության համար, եթե կան օպերատիվ տվյալներ զենք-զինամթերքի առկայության, թմրանյութի օգտագործման մասով, չկա որևէ տարբերություն, թե տվյալը ում մասին է, տվյալը ստանալուց հետո պետք է իրացվի։ Վերջնարդյունքում տվյալը կարող է լինել ոչ հավաստի»,-ասաց նա՝ չհստակեցնելով, թե, ի վերջո, ինչու են նշյալ անձանց անվտանգության աշխատակիցները բերման ենթարկվել։

Մանրամասները՝ տեսանյութում։