08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Ալիևի օգնականը խոսել է ՀՀ-ից փոխհատուցման պահանջից
13.03.2025 | 14:01
Ադրբեջանի նախագահ Իլհամ Ալիևի օգնական Հիքմեթ Հաջիևը այսօր ադրբեջանական լրատվամիջոցների հետ զրույցում անդրադարձել է Բաքվում ապօրինի պահվող Արցախի նախկին ու ներկա ռազմաքաղաքական ղեկավարների, հայ գերների շինծու դատավարություններին։
«Ադրբեջանի դեմ Հայաստանի հանցագործությունները չեն մոռացվի։ Բաքվում դատավարություն է ընթանում մարդկության դեմ հանցագործություն կատարած անձանց նկատմամբ։ Հայաստանը ներկայումս անիմաստ քարոզչական արշավ է իրականացնում այս դատարանի դեմ։ Անձինք, որոնց դատում են այդ դատարանում, պատասխան են տալիս օրենքի առաջ։ Անընդունելի է նրանց անվանել գերի կամ պատանդ»,-ասել է Հաջիևը՝ հավելելով․
«Հայաստանի տարածքում կան մարդիկ, որոնք ռազմական հանցագործություններ են կատարել մարդկության, ադրբեջանական ժողովրդի դեմ, և նրանք պետք է քրեական պատասխանատվության ենթարկվեն»։
Նա նշել է, թե Հայաստանը սխալվում է, եթե կարծում է, որ հնարավոր է ցանկացած բանաձևով ազդել Ադրբեջանի կամքի վրա.
«Հայաստանն ու նրա հովանավորները սխալվում են։ Քննարկման առարկա է նաև փոխհատուցման հարցը։ Համապատասխան կառույցները ժամանակակից մեթոդների կիրառմամբ ճշգրիտ և մանրամասն գնահատել են Հայաստանի կողմից 30-ամյա օկուպացիայի ընթացքում հասցված վնասները։ Այս հարցը նույնպես առանձին քննարկման թեմա է տարածաշրջանում խաղաղության լիարժեք ապահովման համար»,-ասել է նա՝ նշելով, թե իբր «եթե Հայաստանը խաղաղություն է ցանկանում տարածաշրջանում, ապա պետք է սերտորեն համագործակցի Բաքվի դատական իշխանության հետ»։
Շարունակելով ադրբեջանական կեղծ քարոզչական թեզերի շարքը՝ Հաջիևը մատնանշել է Հայաստանի Սահմանադրության փոփոխության անհրաժեշտությունը՝ իբրև թե կապված Ադրբեջանի նկատմամբ տարածքային պահանջների հետ։ Նա ասել է, թե համապատասխան փորձը կա և Իռլանդիան պարտավորվել է փոփոխել իր Սահմանադրությունը և ճանաչել Մեծ Բրիտանիայի լիակատար ինքնիշխանությունը Հյուսիսային Իռլանդիայի նկատմամբ։
«Սա անհրաժեշտ պայման է տարածաշրջանում համապարփակ խաղաղություն ապահովելու համար: Այսօր Մինսկի խմբի կարիքը չկա: Եթե ինչ-որ մեկը փորձի վերակենդանացնել Մինսկի խումբը, դա ուտոպիա է: Հայաստանը փորձում է պահպանել Մինսկի խումբը: Նման հարցերի, հատկապես Հայաստանի Սահմանադրությանը վերաբերող հարցերի լուծումից հետո, տարածաշրջանում խաղաղության օրակարգի համար ավելի լավ պայմաններ կստեղծվեն»,-հայտարարել է Ալիևի օգնականը։
Թարգմանությունը՝ Էմմա Չոբանյանի
