25.05.2026 | 12:29
«Խոսակցությունները չեն համապատասխանում իրականությանը»․ ԿԳՄՍ-ն՝ Արտամետի Գուրգեն Մարգարյանի անվան դպրոցի փակման մասին
Թուրքիան ողջունում է Ուկրաինայի կողմից հրադադարի ընդունումը և առաջարկում հյուրընկալել բանակցությունները․ Էրդողան
Քաղաքականություն
13.03.2025 | 16:50
Թուրքիայի նախագահ Ռեջեփ Թայիփ Էրդողանը ողջունել է Ուկրաինայի կողմից Ռուսաստանի հետ շարունակվող հակամարտությունում հրադադարի ընդունումը՝ հույս հայտնելով, որ Մոսկվան «կառուցողական» կպատասխանի, գրում է Turkiye today-ը։
«Թուրքիան ի սկզբանե հանդես է եկել արդար խաղաղության օգտին, որպեսզի վերջ դրվի Ռուսաստանի և Ուկրաինայի միջև պատերազմին»,- հավելել է նա։
Էրդողանը ընդգծել է Թուրքիայի պատրաստակամությունը՝ աջակցելու խաղաղ գործընթացին, ներառյալ՝ հնարավոր բանակցությունների հյուրընկալումը։
«Եթե վերջին զարգացումները ճանապարհ հարթեն Ռուսաստանի և Ուկրաինայի՝ բանակցությունների սեղան վերադառնալու համար, Թուրքիան պատրաստ է առաջարկել իր լիակատար աջակցությունը»,- ասել է Թուրքիայի նախագահը։
Անկարայում Լեհաստանի վարչապետ Դոնալդ Տուսկի հետ համատեղ մամուլի ասուլիսի ժամանակ Էրդողանը նաև Եվրամիությանը Թուրքիային լիիրավ անդամակցության կոչ է արել՝ ասելով, որ եթե ԵՄ-ն հույս ունի կանխել կամ «վերացնել իր ուժի և ազդեցության անկումը», ապա պետք է ընդունի Թուրքիայի ընդգրկումը դաշինքում:
Քննարկելով թուրք-լեհական հարաբերությունները՝ Էրդողանն ընդգծել է երկու երկրների՝ որպես ՆԱՏՕ-ի ռազմավարական դաշնակիցների կարևորությունը։ Նա նշել է, որ Թուրքիան և Լեհաստանը տեղակայված են ՆԱՏՕ-ի արևելյան ու հարավային թևերում և ղեկավարում են Եվրոպայի երկու խոշորագույն ցամաքային բանակները դաշինքի շրջանակում։
Լեհաստանի վարչապետ Դոնալդ Տուսկն իր հերթին Թուրքիային առաջարկել է ակտիվ դերակատարություն ունենալ Ռուսաստանի և Ուկրաինայի միջև խաղաղ բանակցություններ սկսելու գործում։ Տուսկն ասել է, որ և՛ Թուրքիան, և՛ Լեհաստանը հակամարտության սկզբից ի վեր հանդես են գալիս խաղաղության օգտին՝ ողջունելով Սաուդյան Արաբիայում շաբաթվա սկզբին տեղի ունեցած դիվանագիտական ջանքերը։
Թարգմանությունը՝ Էմմա Չոբանյանի
