08.09.2026 | 22:48
Զելենսկին հայտնել է սեպտեմբերի վերջին Թրամփի հետ հանդիպելու ծրագրերի ու Ուկրաինա-ԱՄՆ-ՌԴ հնարավոր բանակցությունների մասին
Կրեմլում ԱՄՆ-ից մանրամասների են սպասում 30-օրյա հրադադարի առաջարկի վերաբերյալ
Քաղաքականություն
12.03.2025 | 15:59
ՌԴ նախագահի մամուլի խոսնակ Դմիտրի Պեսկովը հայտարարել է, որ Կրեմլը չի մեկնաբանում Ռուսաստանի և Ուկրաինայի միջև 30-օրյա հրադադարի մասին առաջարկը, քանի դեռ ԱՄՆ-ից մանրամասն տեղեկատվություն չի ստացել Ջիդդայում տեղի ունեցած ամերիկա-ուկրաինական բանակցությունների էության մասին, գրում է Ինտերֆաքսը։
«Դուք մի փոքր առաջ եք անցնում։ Մենք չենք ցանկանում դա անել։ Երեկ մամուլի հետ զրույցում պետքարտուղար Մարկո Ռուբիոն և ԱՄՆ ազգային անվտանգության հարցերով խորհրդական Մայք Ուոլցն ասացին, որ տարբեր ուղիներով մեզ մանրամասն տեղեկատվություն կփոխանցեն Ջիդդաում տեղի ունեցած զրույցի էության մասին։ Սկզբում մենք պետք է ստանանք այդ տեղեկատվությունը»,- ասել է Պեսկովը։
Նա նշել է, որ այս օրերին նախատեսված են շփումներ ամերիկացիների հետ, որոնց ընթացքում հույս ունեն ստանալ ամբողջական տեղեկատվություն։
«Մենք նաև չենք բացառում, որ կարող է առաջանալ ամենաբարձր մակարդակով հեռախոսազրույցի թեմա: Եթե նման անհրաժեշտություն առաջանա, այն շատ արագ կկազմակերպվի: Ամերիկացիների հետ երկխոսության՝ գոյություն ունեցող ուղիները թույլ են տալիս դա անել բավականին կարճ ժամանակում»,- հավելել է Կրեմլի խոսնակը։
Նա նաև նշել է, որ նման հեռախոսազրույցի վերաբերյալ դեռևս պայմանավորվածություններ չկան, Վաշինգտոնի կողմից դիմում էլ չկա։
Հարցին էլ՝ հստակություն կա՞ Պուտինի և Թրամփի հնարավոր բանակցությունների ժամկետի ու վայրի վերաբերյալ, նա բացասական պատասխան է տվել։
Հիշեցնենք, որ ավելի վաղ ԱՄՆ նախագահ Դոնալդ Թրամփը հայտնել էր առաջիկայում ՌԴ-ԱՄՆ հանդիպման մասին, ինչպես նաև հայտարարել է, որ նախատեսում է հեռախոսազրույց ունենալ Վլադիմիր Պուտինի հետ։
Թարգմանությունը՝ Էմմա Չոբանյանի
