08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Թրամփը չեղարկել է Կանադայից պողպատի և ալյումինի ներմուծման՝ մինչև 50% հավելյալ մաքսատուրքերի սահմանումը
Քաղաքականություն
12.03.2025 | 13:38
ԱՄՆ նախագահ Դոնալդ Թրամփն այլևս չի նախատեսում չորեքշաբթի բարձրացնել կանադական պողպատի և ալյումինի ներմուծման մաքսատուրքերը մինչև 50%։ Այս մասին CNBC-ին ասել է Սպիտակ տան առևտրի հարցերով գլխավոր խորհրդական Պիտեր Նավարոն։
Այս ամենը տեղի է ունեցել վեց ժամ այն բանից հետո, երբ Թրամփը հայտարարել էր կանադական մետաղների ներմուծման մաքսատուրքերը կրկնապատկելու ծրագրի մասին՝ ի պատասխան կանադական Օնտարիոյի՝ ԱՄՆ էլեկտրաէներգիայի արտահանման վրա 25% հարկ սահմանելու որոշման:
Օնտարիոյի վարչապետ Դագ Ֆորդը հայտարարել էր, որ դադարեցնում է այդ հավելավճարի սահմանումը ԱՄՆ առևտրի նախարար Հովարդ Լուտնիկի հետ քննարկումներից հետո: Ֆորդը և Լուտնիկը նաև պայմանավորվել են հանդիպել Վաշինգտոնում մարտի 13-ին՝ քննարկելու եռակողմ (ԱՄՆ, Կանադա, Մեքսիկա) ազատ առևտրի համաձայնագիրը:
Ֆորդը Լուտնիկի հետ իր բանակցություններն անվանել է «արդյունավետ զրույցներ»: Նավարոն էլ CNBC-ին ասել է, որ Լուտնիկը «հիանալի աշխատանք է կատարել բանակցություններում»:
Ավելի վաղ Ֆորդը հայտարարել էր, որ 25% սակագին կսահմանի Մինեսոտա, Միչիգան և Նյու Յորք նահանգներին մատակարարվող էլեկտրաէներգիայի համար՝ ի պատասխան ԱՄՆ-ի կողմից սակագների բարձրացման:
Մարտի 11-ին Դոնալդ Թրամփը հայտարարել էր, որ հանձնարարել է երկրի առևտրի նախարարին մինչև 50% լրացուցիչ մաքսատուրքեր սահմանել Կանադայից պողպատի և ալյումինի ներկրման համար՝ ի պատասխան Կանադայի կողմից ԱՄՆ էլեկտրաէներգիայի արտահանման հավելավճարի։ Օտտավան պատասխանել էր Կանադայից տարբեր ապրանքների ներմուծման 25% մաքսատուրքերին, որոնք Թրամփն ավելի վաղ սահմանել էր։
Թարգմանությունը՝ Էմմա Չոբանյանի
