Քաղաքականություն
11.03.2025 | 22:29
Ներկայում Ադրբեջանը բնական գազ է արտահանում 12 երկիր, իսկ գնորդների աշխարհագրական դիրքն ընդգրկում է եվրասիական տարածքը։ Այս մասին հայտարարել է Ադրբեջանի նախագահ Իլհամ Ալիևը Բաքվում Հյուսիսային Մակեդոնիայի նախագահ Գորդանա Սիլյանովսկա-Դավկովայի հետ բանակցություններից հետո մամուլի համար արված հայտարարության մեջ։
«Անցյալ տարի Ադրբեջանը 25 միլիարդ խորանարդ մետր գազ է արտահանել արտաքին շուկաներ։ Իհարկե, մենք դրանից շատ ավելին ենք արտադրում»,- ասել է Ալիևը՝ հավելելով, որ Եվրոպան ադրբեջանական գազի կարիքն ունի։
Նա ընդգծել է, որ դրա վառ դրսևորումն է մոտ երեք տարի առաջ Բաքվում ստորագրված Ադրբեջանի Հանրապետության և Եվրամիության միջև էներգետիկ ոլորտում ռազմավարական գործընկերության մասին հռչակագիրը։
Ալիևը նաև նշել է, որ ադրբեջանական գազը եվրոպական շատ երկրների էներգետիկ անվտանգությունն է ապահովում։
«Մենք միշտ շատ ուշադիր ենք եղել Եվրոպայում մեր գործընկերների խնդրանքներին։ Այսինքն՝ էներգետիկ ոլորտում երկկողմ համագործակցությունը մեզ համար շատ կարևոր է, և ես հուսով եմ, որ այս գործնական համագործակցությունը կբերի փոխգործակցության նաև այլ ոլորտներում»,- հայտարարել է Ադրբեջանի նախագահը։
Թարգմանությունը՝ Էմմա Չոբանյանի
