08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Հալեպի նահանգապետի տեղակալն ու ՀՀ գլխավոր հյուպատոսը հայ-սիրիական կապերի ընդլայնման հնարավորություններն են քննարկել
Քաղաքականություն
11.03.2025 | 16:12
Հալեպի նահանգապետի տեղակալ Ալի Հաննուրան և վերջինիս գլխավորած պատվիրակությունը մարտի 10-ին այցելել են Հալեպում ՀՀ գլխավոր հյուպատոսություն։ Սիրիացի պաշտոնյայի պատվիրակության կազմում են եղել նաև նահանգապետի խորհրդական Ղասսան Ֆարրուհը, աշխատակազմի ղեկավար Ապտ ու-Մունայիմ Ազատտինը, արտաքին և քաղաքական հարաբերությունների վարչության պետ Ահմեդ Բատաուին և հասարակայնության հետ կապերի վարչության պետ Եասեր Մաուլոյը:
Նշվում է, որ փոխադարձ ճանաչողական զրույցի ընթացքում ՀՀ գլխավոր հյուպատոս Արա Ավետիսյանն անդրադարձել է հայ-արաբական պատմական կապերին, հայ և սիրիացի ժողովուրդների միջև ավանդական ջերմ հարաբերություններին, որն ազգամիջյան բարեկամության դասական օրինակ կարող է ծառայել և օգտակար լինել՝ վերականգնելու հանդուրժողականությունը:
«Հյուրերն իրենց լիարժեք համաձայնությունն են հայտնել այս ուղղությամբ՝ հավելելով, որ իրենք Սիրիայի հայ քաղաքացիների և Հայաստանի հանդեպ մեծ ակնածանք և հարգանք ունեն, ու այդ վերաբերմունքը շարունակական պիտի լինի»,- ասվում է տեղի հայկական «Գանձասար» պարբերականի տարածած հաղորդագրության մեջ:
ՀՀ գլխավոր հյուպատոսը նաև ներկայացրել է համագործակցության լայն շրջանակը բոլոր ասպարեզներում, որն ավանդաբար գոյություն ունի Հայաստանի և Սիրիայի միջև՝ հավելելով, որ Հայաստանը միշտ պատրաստ է աջակցել և համագործակցել Սիրիայի բարեկամ ժողովրդի կողմից ընտրված իշխանությունների հետ: Արա Ավետիսյանը հյուրերին է ներկայացրել Հայաստանի արտաքին գործերի նախարարի տեղակալ Վահան Կոստանյանի՝ վերջերս Դամասկոս կատարած այցելության, ձեռք բերված համաձայնությունների կատարման ընթացքը:
«Գլխավոր հյուպատոսը նաև համագործակցության իր տեսլականն է ներկայացրել հյուրերին՝ ակնկալելով նաև նրանց ցանկությունները և դիտարկումներն այդ ուղղությամբ»,- ասվում է հաղորդագրությունում։
Նշվում է, որ Հալեպի նահանգապետի տեղակալը պատրաստակամություն է հայտնել աջակցություն ցուցաբերել Հալեպում ՀՀ գլխավոր հյուպատոսության աշխատանքներին:
Կողմերը պայմանավորվել են փոխադարձաբար մշտական կապի մեջ լինել:
