13.03.2026 | 10:45
Իրաքյան Քուրդիստանում ԱԹՍ-ի հարձակման հետևանքով ֆրանսիացի զինվոր է զոհվել, մի քանիսը վիրավորվել են․ Մակրոն
Ադրբեջանցի հայտնի ընդդիմադիր գործչին Բաքվի դատարանը դատապարտել է 9 տարվա ազատազրկման
Քաղաքականություն
11.03.2025 | 20:13
Երեկ երեկոյան տեղի է ունեցել Ադրբեջանի «Մուսավաթ» կուսակցության անդամ, հայտնի ընդդիմադիր գործիչ Թոֆիգ Յագուբլուի դեմ հարուցված քրեական գործով եզրափակիչ դատական նիստը։
Իր եզրափակիչ հայտարարության մեջ քաղաքական գործիչն ասել է, որ իր դեմ արդեն 4 անգամ քրեական գործ է հարուցվել, իսկ նախորդ երեք դատարաններն իրեն մեղավոր են ճանաչել ու դատապարտել։
«Ես վճռականորեն հայտարարում եմ, որ այս բոլոր քրեական և վարչական մեղադրանքները վերաբերում են ինձ հենց այնքանով, որքանով դրանք վերաբերում են Իլհամ Ալիևին, ինչպես նաև նրանց, որոնք այստեղ իրենց դատավոր են հռչակում, իբր պետական դատախազի դերում հանդես եկող անձին, դատարանի քարտուղարին և այս սենյակում նստածներին։ Առանց բացառության բոլոր մեղադրանքներն օդից են վերցվել, և այս ամենը պայմանավորված է նրանով, որ ես ընդդիմադիր քաղաքական գործիչ եմ»,- ասել է նա։
Դատարանի որոշմամբ Թոֆիգ Յագուբլուն դատապարտվել է 9 տարվա ազատազրկման։
Նշենք, որ Յագուբլուն ձերբակալվել է 2023թ-ի դեկտեմբերին 14-ին խարդախության, պաշտոնական փաստաթղթերի ապօրինի պատրաստման և կեղծ փաստաթղթեր օգտագործելու մեղադրանքով։ Քաղաքական գործիչը մեղադրանքները հորինված է գնահատում։
Ըստ մեղադրական եզրակացության՝ Էլնուր Մամեդովի միջոցով Թոֆիգ Յագուբլուին փոխանցվել է 25.000 եվրո և 10.000 մանաթ, որպեսզի Ադրբեջանի քաղաքացի Էլշան Հուսեյնովը կարողանա մեկնել Գերմանիա և այնտեղ քաղաքացիություն ստանալ։ Սակայն Թոֆիգ Յագուբլուն մեղադրանքները կեղծ է անվանել։ Քաղաքական գործիչը պնդում է, որ նման խոսակցություններ չի ունեցել Էլշան Հուսեյնովի կամ Էլնուր Մամեդովի հետ։ Ի դեպ, Էլշան Հուսեյնովն էլ դատապարտվել է 8 տարվա ազատազրկման։
Հավելենք, որ Յագուբլուն Ադրբեջանի նախագահ Իլհամ Ալիևի կոշտ քննադատներից է, բազմիցս ձերբակալվել ու ազատազրկման է դատապարտվել, նաև ուժայինների կողմից ծեծի ենթարկվել։ 2013 թվականին նա կալանավորվել էր Իսմայիլիում բողոքի ցույցեր կազմակերպելու մեղադրանքով։ 5 տարվա ազատազրկման դատապարտված քաղաքական գործիչը 2017 թվականին ազատ է արձակվել ներման իրավունքով։
Նախորդ անգամ նա ձերբակալվել է 2022 թվականի դեկտեմբերի 23-ին Բաքվի կենտրոնում ակտիվիստ Բահտիյար Հաջիևի ազատ արձակման պահանջով բողոքի ցույցի ժամանակ։ Բաքվի Սաբայիլի շրջանային դատարանի որոշմամբ նա 30 օրվա կալանքի էր դատապարտվել։ Ի նշան բողոքի՝ 2023 թվականի հունվարի 5-ին Յագուբլուն հացադուլ էր հայտարարել։ Հունվարի 22-ին 30-օրյա վարչական կալանքից հետո ազատ էր արձակվել։
Էմմա Չոբանյան
