Էրդողանը դատապարտել է Սիրիայի միասնության դեմ հարձակումները՝ աջակցություն հայտնելով նախագահ Ալ-Շարաային

Թուրքիայի նախագահ Ռեջեփ Թայիփ Էրդողանը հայտարարել է, որ Անկարան «խստորեն» դատապարտում է բոլոր հարձակումները, որոնք սպառնում են Սիրիայի տարածքային ամբողջականությանը և սոցիալական կայունությանը, ինչպես նաև ահաբեկչական գործողությունները, գրում է Turkiye today-ը։

Էրդողանը նշել է, որ Սիրիայում իրավիճակը հիմնականում վերահսկվել է սիրիական կառավարական ուժերի «արդյունավետ միջամտության» միջոցով, սակայն իրավիճակը մնում է փխրուն։ Նա ընդգծել է՝ Թուրքիան ձեռնարկում է անհրաժեշտ նախազգուշական միջոցներ՝ կանխելու ցանկացած զարգացում, որը կարող է բացասաբար ազդել երկրի վրա։ Նա նաև կոչ է արել Սիրիային արագ գործել՝ տարածաշրջանում լարվածությունը թուլացնելու համար:

«Սիրիայի կառավարության արդյունավետ միջամտության շնորհիվ միջադեպերը հիմնականում վերահսկվել են, սակայն իրավիճակը տեղում մնում է զգայուն։ Թուրքիան խստորեն դատապարտում է բոլոր հարձակումներն ու ահաբեկչական գործողությունները, որոնք ուղղված են Սիրիայի միասնությանը և սոցիալական խաղաղությանը։ Մենք ձեռնարկում ենք անհրաժեշտ նախազգուշական միջոցներ և կոչ ենք անում Սիրիայի իշխանություններին՝ արագ թուլացնել լարվածությունը»:

Նա ողջունել է նաև կարգուկանոն պահպանելու՝ Սիրիայի նախագահ Ահմեդ ալ-Շարաայի հանձնառությունը։

Հիշեցնենք, որ Սիրիայում նախագահ նախագահ Բաշար Ասադի կողմնակիցների ու կառավարական ուժերի բախումների հետևանքով 1000-ից ավելի մարդ է զոհվել։

Էրդողանը նաև կրկնել է, որ Թուրքիան իր քաղաքականությունը չի հիմնում Իրաքում, Սիրիայում, Լիբանանում կամ տարածաշրջանի որևէ այլ երկրում էթնիկ, կրոնական բաժանումների վրա։ Անդրադառնալով եվրոպական անվտանգության խնդրին և Ուկրաինայում խաղաղության հաստատման հեռանկարներին՝ Էրդողանն ասել է, թե ցանկանում են, որ «եվրոպացի ընկերները հասկանան նոր Թուրքիայի դերը փոխված աշխարհում և ըստ այդմ սահմանեն իրենց ռազմավարությունները»:

Էրդողանն ընդգծել է՝ Թուրքիան փորձում է բարելավել հարաբերությունները ԵՄ-ի հետ՝ նկատի ունենալով լիիրավ անդամակցությունը։

Թարգմանությունը՝ Էմմա Չոբանյանի