04.06.2026 | 15:18
ՌԴ ԱԳՆ-ն Հայաստանից ապրանքների ներմուծման սահմանափակումները բացատրել է բուսասանիտարական նորմերով
Հակակոռուպցիոն կոմիտեի նախագահի մրցույթում 3 թեկնածու անցավ անցողիկ շեմը. Կառավարությունը կընտրի նրանցից մեկին․ ՏԵՍԱՆՅՈՒԹ
Քաղաքականություն
11.03.2025 | 01:11
Ավելի քան երեք ամիս առանց ղեկավար աշխատած Հակակոռուպցիոն կոմիտեն առաջիկայում նոր նախագահ կունենա։ Այսօր 13 ժամ տևած մրցույթից հետո հանձնաժողովի կողմից ամենաշատ ձայներ հավաքեցին Քննչական կոմիտեի նախագահի տեղակալ Արթուր Նահապետյանը, վարչապետի աշխատակազմի տեսչական մարմինների աշխատանքների համակարգման գրասենյակի ղեկավար Պետրոս Մարտիրոսյանը և ապօրինի ծագում ունեցող գույքի բռնագանձման գործերով վարչության նախկին ավագ դատախազ Գևորգ Քոչարյանը։ Այս փուլից հետո ընտրված թեկնածուները պետք է ներկայացվեն Կառավարություն, որտեղ հավանության արժանանալուց հետո նրանցից մեկը պաշտոնապես կնշանակվի Հակակոռուպցիոն կոմիտեի նախագահ։
Հիշեցնենք՝ ՀԿԿ նախագահի պաշտոնի համար պայքարում էր 5 թեկնածու, Հակակոռուպցիոն կոմիտեի քննչական երրորդ վարչության հատկապես կարևոր գործերով ավագ քննիչ Արտաշես Մաիլյանը և փաստաբան Կարեն Բատիկյանը ևս ցուցակում էին։ Խորհրդի անդամները Բատիկյանի բարեվարքությունը գնահատեցին 90, Մաիլյանինը՝ 266, Մարտիրոսյանինը՝ 393, Նահապետյանինը՝ 439 և Քոչարյանինը 379 միավոր։ Թեկնածուները պետք է նվազագույնը 300-ի շեմը հաղթահարեին։
Թեկնածուներից յուրաքանչյուրին 5 հոգուց բաղկացած խորհրդի անդամները տարբեր հարցեր ուղղեցին՝ ստուգելու նրանց մասնագիտական կարողությունը եւ գնահատելու նրանց բարեվարքությունը։
Նշենք, որ մրցույթն անցկացվում է երկրորդ անգամ, առաջին անգամ բարեվարքության շեմը չհաղթահարեց Ազգային անվտանգության ծառայության տնտեսական անվտանգության և կոռուպցիայի հակազդման գլխավոր վարչության պետ Ռաֆայել Երիցյանը։
Ռոզա Վարդանյան
