09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
Վաշինգտոնում Ադրբեջանի դեսպանն ԱՄՆ-ի հետ ռազմավարական դաշնակցության կոչ է արել
Քաղաքականություն
10.03.2025 | 22:22
Վաշինգտոնում Ադրբեջանի դեսպան Խազար Իբրահիմը Newsmax-ին տված հարցազրույցում խոսել է երկու երկրների երկարամյա գործընկերության մասին, փոխանցում են ադրբեջանական լրատվամիջոցները։ Դիվանագետը նշել է, որ ԱՄՆ-ը միշտ աջակցել է Ադրբեջանի անկախությանը և ինքնիշխանությանը։ Նրա խոսքով՝ Ադրբեջանն ԱՄՆ-ին դիտարկում է որպես «ռազմավարական դաշնակից և դաշնակից, որի նկատմամբ նա բարոյական պարտավորություններ ունի»։
«Մեր հարաբերությունները կրում են շատ ռազմավարական, խորը և ամուր բնույթ։ Մենք սկսել ենք մեր համագործակցությունը 1990-ականների սկզբին և բարձր ենք գնահատում այն ամբողջ օգնությունը, որը Միացյալ Նահանգները ցուցաբերել է այդ ժամանակահատվածում Ադրբեջանի անկախությանը և ինքնիշխանությանը։ Մենք նաև հիմք ենք դրել ամերիկյան խոշոր ընկերությունների հետ էներգետիկ սերտ համագործակցության համար»,- ասել է դեսպանը։
Իբրահիմը երախտագիտություն է հայտնել ԱՄՆ-ին «Դարի պայմանագրի» իրականացման գործում ունեցած առանցքային դերի համար, որը թույլ է տվել Ադրբեջանին նավթ վաճառել Եվրոպային: Նա նաև ընդգծել է, որ Ադրբեջանն իր հերթին աջակցել է ԱՄՆ-ին Մերձավոր Արևելքում ահաբեկչության դեմ պայքարում։
Հիշեցնենք, որ Ադրբեջանի իշխանություններն ամենաբարձր՝ նախագահ Իլհամ Ալիևի մակարդակով վերջին տարիներին պարբերաբար քննադատում էին ԱՄՆ նախկին նախագահ Ջո Բայդենին և նրա վարչակազմին, իբր, Բաքվի նկատմամբ կողմնակալ և անարդար քաղաքականություն վարելու համար։
Դոնալդ Թրամփի նախագահ ընտրվելուց հետո Բաքուն հույս ունի հարաբերությունները կարգավորել Վաշինգտոնի հետ։ Ավելի վաղ էլ Ալիևը հույս էր հայտնել, որ կվերսկսեն ԱՄՆ-ի հետ աշխատանքը։
Հարաբերությունների բարելավման համար Բաքուն փորձում է նաև ներգրավել Իսրայելին։ Ըստ իսրայելական լրատվամիջոցների՝ Թել Ավիվը ձգտում է Ադրբեջանին ներգրավել Թրամփի տարածաշրջանային ծրագրերում և Իսրայելի շահերում, բացի այդ, Իսրայելը բանակցում է ԱՄՆ-ի հետ՝ Ադրբեջանի հետ եռակողմ համագործակցություն հաստատելու համար։
Հիշեցնենք, որ հունվարին ստորագրվել էր ՀՀ-ԱՄՆ ռազմավարական գործընկերության կանոնադրությունը, որը Բաքվում մտահոգություններ էր առաջացրել։
Թարգմանությունը՝ Էմմա Չոբանյանի
