06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Դպրոցի երրորդ հարկի պատուհանից ընկած երեխայի վիճակը կայուն է
Հասարակություն
06.03.2025 | 15:25
Կոտայքի մարզի Ջրվեժի միջնակարգ դպրոցի երրորդ հարկից ընկած աշակերտի առողջական վիճակն այս պահին կայուն է: Տեղեկությունը Factor.am-ին հայտնեց դպրոցի նախկին տնօրեն, այժմ վարչատնտեսական հարցերի համակարգող Լիլիթ Վարդանյանը:
«Երեխայի ոտքն է կոտրված, ճակատային հատվածը՝ վնասված: Պատուհանից թռել է, ոտքերի վրա իջել ու ընկել: Գիտակցության անկում չի եղել, ամբողջ ժամանակ ասել է՝ կներեք, ես չհասկացա, ես պիտի չանեի»,- ասաց դպրոցի աշխատակիցը:
ՆԳՆ ոստիկանության լրատվության վարչությունից փոխանցում են, որ Ջրվեժի դպրոցի երրորդ հարկի պատուհանից երեխայի ընկնելու դեպքի վերաբերյալ ահազանգ ունեն:
Հիշեցնենք, որ ավելի վաղը Factor.am-ը գրել էր, որ Կոտայքի մարզի Ջրվեժի միջնակարգ դպրոցում աշակերտ է ընկել դպրոցի երրորդ հարկից։ Դպրոցի բակում հավաքված ծնողները Factor.am-ին փոխանցեցին, որ երեխան իրեն նետել է դասարանի պատշգամբից։ Բակում հավաքված երեխաներն էլ խոսում էին, որ 7-րդ դասարանի աշակերտը մոտենալով բաց պատշգամբին դասարանում ասել է, թե պատուհանը փակում է, սակայն կանգնել է և իրեն ցած նետել երորդ հարկից։ Այս կամ այն վարկածի պաշտոնական հաստատում չկա։
Անի Թամրազյան
