17.07.2026 | 21:00
ՔՆՆԱՐԿՈւՄ․ Իսպանիա vs Արգենտինա․ Ֆուտբոլային մեծ բախում՝ Աշխարհի չեմպիոնի գավաթի համար․ ո՞ր թիմը կհաղթի․ ՏԵՍԱՆՅՈՒԹ
Թուրքիան Հունաստանի հետ սահմանի երկայնքով պատ կկառուցի
Քաղաքականություն
05.03.2025 | 21:43
Թուրքիայի իշխանությունները հայտարարել են Էդիրնեում Հունաստան-Թուրքիա սահմանի երկայնքով անվտանգության պատ կառուցելու մտադրության մասին՝ անկանոն միգրացիան կանխելու շարունակական ջանքերի շրջանակում, գրում է Turkiye Today-ը։
Նախագծի առաջին փուլը կներառի 8,5 կմ հատված, հայտարարել է Էդիրնեի նահանգապետ Յունուս Սեզերը:
«Այս տարի առաջին անգամ ֆիզիկական անվտանգության միջոցառումներ կիրականացնենք մեր արևմտյան սահմանին։ Սահմանագիծը կամրացվի պատերով և պարիսպներով։ Նախկինում գործում էին միայն պարեկային ճանապարհներ։ Այժմ մրցույթ է հայտարարվել ֆիզիկական պատնեշների կառուցման համար՝ ինչպես արևելյան սահմանին»,- հայտարարել է նա։
Նախագիծը հետևում է Թուրքիայի արևմտյան սահմանի երկայնքով անվտանգության նախկին ուժեղացումներին: 2023 թվականին իշխանություններն արդիականացրել են 325 կիլոմետր սահմանային ճանապարհներ։
Սեզերը նշել է, որ շինարարությունը սկզբում կկենտրոնանա Հունաստան-Թուրքիա սահմանի վրա, իսկ ապագայում նախատեսվում է երկարացնել պատը։
«Առաջին փուլում կլինի 8,5 կիլոմետր, սակայն աստիճանաբար կամրացվի ամբողջ սահմանային տարածքը։ Այս ծրագիրն իրականացվում է Ներքին գործերի նախարարության և Սահմանային կառավարման գլխավոր տնօրինության աջակցությամբ»,- պարզաբանել է նահանգապետը։
Թարգմանությունը՝ Էմմա Չոբանյանի
