Քաղաքականություն
03.03.2025 | 20:13
Իրանի ԱԳՆ խոսնակ Էսմայիլ Բաղային կոչ է արել Իրանին, Թուրքիային և այլ երկրներին՝ կենտրոնանալ հակամարտություններից հեռու անվտանգ տարածաշրջան ստեղծելու վրա։ MEHR-ի փոխանցմամբ՝ նա այսպես է արձագանքել Թուրքիայի ԱԳ նախարար Հաքան Ֆիդանի՝ ավելի վաղ արված հայտարարություններին։
«Մենք շատ բարձր ենք գնահատում Թուրքիայի հետ երկկողմ հարաբերությունները: Մենք գիտակցում ենք երկու հարևան և պատմական ժողովուրդների հարաբերություններում փոխադարձ շահերի կարևորությունն ու առկայությունը»,- ասել է Բաղային՝ հավելելով, որ իմաստուն մոտեցմամբ երկու երկրները կարողացել են լուծել կարծիքների տարաձայնությունները՝ չվնասելով հարաբերություններին։
Նա ասել է, որ հակամարտություններից հեռու անվտանգ տարածաշրջանի ստեղծումը պետք է քննարկեն Իրանը, Թուրքիան և այլ երկրներ։
«Մենք կարծում ենք, որ Թուրքիան և՛ գիտակցում է, և՛ հավատարիմ է երկու ժողովուրդների ազգային շահերի վրա հիմնված երկկողմ հարաբերությունների պահպանման և խթանման կարևորությանը»,- հավելել է Իրանի ԱԳՆ խոսնակը։
Ավելի վաղ Հաքան Ֆիդանը, խոսելով Սիրիայի դեպքերի վերաբերյալ Իրանի քաղաքականության մասին, ասել էր․ «Տարածաշրջանի երկրներում աշխարհազորայինների միջոցով Իրանի արտաքին քաղաքականության հարցը քաղաքականություն է, որն Իրանը երկար ժամանակ վարում է մեծ ռիսկերով։ Նա որոշակի հաջողությունների է հասել, բայց այդ հաջողությունը պահպանելու համար վճարած գինը շատ ավելի բարձր է։ Իրաքում և Սիրիայում իր նվաճումները պահպանելու համար Իրանը ստիպված էր զոհաբերել շատ ավելին, քան այդ ձեռքբերումները»:
Նա նշել էր, թե բանակցություններում Իրանի պաշտոնյաներին ասել է, որ արտաքին քաղաքականության այս մոտեցումը պետք է փոխվի։
Թարգմանությունը՝ Էմմա Չոբանյանի
