Մոսկվան ԱՄՆ-ին առաջարկել է վերականգնել ուղիղ ավիահաղորդակցությունը

Ռուսաստանի ներկայացուցիչները Ստամբուլում ամերիկյան կողմի հետ փետրվարի 27-ին կայացած բանակցություններում առաջարկել են վերականգնել երկու երկրների միջև ուղիղ ավիահաղորդակցությունը։ Այս մասին ասված է ՌԴ ԱԳՆ հայտարարության մեջ, գրում է Meduza-ն։

«Ամերիկյան կողմին առաջարկվել է դիտարկել ուղիղ ավիահաղորդակցության վերականգնման հնարավորությունը»,- ասվում է հայտարարության մեջ։

Ըստ ռուսական կողմի՝ հանդիպմանն «առարկայական կերպով» քննարկվել են «բազմաթիվ «գրգռիչների» հաղթահարման ուղիները, որոնք ժառանգվել են ամերիկյան նախկին վարչակազմերից»։

Նշվում է, որ բանակցությունների ընթացքում «համաձայնեցվել են համատեղ քայլերը՝ փոխադարձ հիմունքներով ապահովելու Ռուսաստանի և Միացյալ Նահանգների դիվանագիտական ​​առաքելությունների գործունեության անարգել ֆինանսավորումն ու համապատասխան պայմաններ ստեղծել դիվանագետների համար՝ իրենց ծառայողական պարտականությունները կատարելու համար»։

«Միացյալ Նահանգներում Ռուսաստանի դիվանագիտական ​​սեփականության հետ կապված հարցերը շոշափվել են նաև 2016-2018 թվականներին ապօրինի զավթված վեց անշարժ գույքը ռուսական կողմին վերադարձնելու համատեքստում։ Հատկապես ընդգծվել է գործնական արդյունքների պահանջարկը, որոնք կոչված են մեր երկրների ժողովուրդների շահերից ելնելով՝ երկկողմ հարաբերությունների բարելավման համար պայմանների ստեղծմանը»,- նշել է ՌԴ ԱԳՆ-ն։

Հիշեցնենք, որ այսօր ավելի վաղ ԱՄՆ Պետքարտուղարությունն էր հայտարարություն տարածել նախօրեին Ստամբուլում տեղի ունեցած ռուս-ամերիկյան բանակցությունների վերաբերյալ։

Թարգմանությունը՝ Էմմա Չոբանյանի