08.10.2026 | 20:43
Իսրայելն Ադրբեջանում արևմտյան չափանիշներով զենքի արտադրման գործարան է բացել
Կառուցողական քննարկում է եղել․ Պետդեպը մանրամասներ է հայտնել Ստամբուլում ԱՄՆ-ՌԴ հանդիպումից
Քաղաքականություն
28.02.2025 | 12:21
ԱՄՆ Պետքարտուղարությունը հայտարարություն է տարածել նախօրեին Ստամբուլում տեղի ունեցած ռուս-ամերիկյան բանակցությունների վերաբերյալ։ Նշվում է, որ Ստամբուլում հանդիպումը հետևել է պետքարտուղար Մարկո Ռուբիոյի և ՌԴ ԱԳ նախարար Սերգեյ Լավրովի միջև ձեռք բերված պայմանավորվածություններին՝ բանակցություններ սկսել դիվանագիտական առաքելությունների գործունեության հետ կապված հարցերի շուրջ։
Ստամբուլյան հանդիպմանը ԱՄՆ պատվիրակությունը գլխավորել է Ռուսաստանի և Կենտրոնական Եվրոպայի հարցերով պետքարտուղարի օգնականի տեղակալ Սոնատա Քուլթերը, իսկ ռուսական պատվիրակությունը՝ ՌԴ ԱԳՆ Հյուսիսատլանտյան դեպարտամենտի տնօրեն, դեսպան Ալեքսանդր Դարչիևը։
«Միացյալ Նահանգները մտահոգություն է հայտնել բանկային և պայմանագրային ծառայությունների հասանելիության, ինչպես նաև Մոսկվայում ԱՄՆ դեսպանատան անձնակազմի կայուն մակարդակ ապահովելու անհրաժեշտության վերաբերյալ: Կառուցողական քննարկումների արդյունքում երկու կողմերն էլ որոշել են կոնկրետ նախնական քայլեր՝ այս ոլորտներում երկկողմ առաքելությունների գործողությունները կայունացնելու համար»,- ասվում է հայտարարության մեջ։
Նշվում է, որ կողմերը պայմանավորվել են առաջիկայում այս հարցերի շուրջ հերթական հանդիպումը կազմակերպել, որի ժամանակն ու վայրը դեռևս որոշված չէ։
Հիշեցնենք, որ Ստամբուլում հանդիպումը տևել է 6,5 ժամ։
Թարգմանությունը՝ Էմմա Չոբանյանի
