Քաղաքականություն
26.02.2025 | 21:50
Ռումինիայում ձերբակալվել է նախագահի թեկնածու, չեղյալ հայտարարված ընտրությունների առաջին փուլի հաղթող Կելին Ջորջեսկուն։ Այս մասին հայտնում է նրա հանրային կապերի թիմը, գրում է Current time-ը։
«Կելին Ջորջեսկուն պատրաստվում էր կրկին նախագահի պաշտոնում առաջադրել իր թեկնածությունը։ Նրան ձերբակալեցին Գլխավոր դատախազությունում հարցաքննության համար: Որտե՞ղ է ժողովրդավարությունը, որտե՞ղ են գործընկերները, որոնք պետք է պաշտպանեն ժողովրդավարությունը»,- ասվում է հաղորդագրության մեջ։
Տեղական լրատվամիջոցների փոխանցմամբ՝ ձերբակալվել է նաև նրա համախոհ և թիկնապահ Հորացիու Պոտրան։ Նրա տանը խուզարկությամբ, ենթադրաբար, հայտնաբերվել են միլիոնավոր դոլարների կանխիկ գումար, ինչպես նաև զենք:
Դատախազության տվյալներով՝ փետրվարի 26-ի առավոտյան խուզարկություններ են կատարվել, ընդհանուր առմամբ, 47 հասցեներում։
Ջորջեսկուն հարցաքննության համար տեղափոխվել է դատախազություն։ Քարոզարշավի ապօրինի ֆինանսավորման և ընտրական օրենսդրության այլ խախտումների վերաբերյալ քրեական գործով այս պահին նա կասկածյալ չէ և որպես վկա է անցնում։
Դեկտեմբերին Ռումինիան չեղյալ էր հայտարարել նախագահական ընտրությունների առաջին փուլի արդյունքները այն բանից հետո, երբ ռումինական հետախուզական ծառայությունները հրապարակել էին փաստաթղթեր, որոնք ցույց էին տալիս Մոսկվայի օգնությունը Ջորջեսկուի հանրահռչակմանը, որն անսպասելիորեն հաղթել էր մրցավազքում:
Գլխավոր դատախազությունը հետաքննում է նրա նախընտրական քարոզարշավի ընթացքում հնարավոր մանիպուլյացիաներն ու ենթադրյալ փողերի լվացման մեղադրանքը։
Թարգմանությունը՝ Էմմա Չոբանյանի
