Ուկրաինայի կառավարությունը փետրվարի 26-ին կայանալիք նիստում կքննարկի ընդերքի մասին համաձայնագրի տեքստը, որը Կիևը նախատեսում է ստորագրել ԱՄՆ-ի հետ։ Այս մասին հայտարարել է Ուկրաինայի վարչապետ Դենիս Շմիգալը, գրում է «Европейская правда»-ն։
Նրա խոսքով՝ համաձայնագիրն արդեն պատրաստ է։
«Այսօր կառավարությունը կքննարկի այս համաձայնագրի տեքստը, կլիազորի նախարարներին ստորագրել այն ավելի ուշ՝ անվտանգության երաշխիքների շուրջ Ուկրաինայի և ԱՄՆ նախագահների բանակցությունների ընթացքում»,- նշել է Շմիգալը։
Նրա խոսքով՝ փաստաթուղթը կստորագրվի այն բանից հետո, երբ նախագահներ Վլադիմիր Զելենսկին և Դոնալդ Թրամփը կհամաձայնեցնեն անվտանգության երաշխիքները։
«Նախագահների ներկայությամբ կառավարության ներկայացուցիչը կստորագրի այս նախնական համաձայնագիրը»,- հավելել է Շմիգալը՝ նշելով, որ ո՛չ Ուկրաինայի նախագահը, ո՛չ էլ Կառավարությունը չեն դիտարկի այդ համաձայնագիրը կամ դրա ստորագրումը՝ Ուկրաինայի անվտանգության երաշխիքներից առանձնացած։
Նա նաև հայտնել է, որ համաձայնագիրն իրավական ուժ կունենա և նախատեսում է Ուկրաինայի վերականգնման համար ներդրումային հիմնադրամի ստեղծում, «որտեղ և՛ Ուկրաինան, և՛ ԱՄՆ-ը հավասարապես կկառավարեն այդ հիմնադրամը և կլրացնեն այն»։
Հիշեցնենք, որ ԱՄՆ նախագահ Դոնալդ Թրամփը նախօրեին հայտարարել էր, որ Ուկրաինայի նախագահ Վլադիմիր Զելենսկին ուրբաթ օրը կայցելի Վաշինգտոն՝ ստորագրելու գործարքը։
Ուկրաինական կողմն էլ պնդում է, որ համաձայնագրից հանվել են Ուկրաինայի համար ամենաանբարենպաստ դրույթները։
Թարգմանությունը՝ Էմմա Չոբանյանի
