08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Չիլիի ողջ տարածքում «բլեքաութ» է գրանցվել
Քաղաքականություն
26.02.2025 | 23:03
Չիլիի մեծ մասը տուժել է փետրվարի 25-ին գրանցված էլեկտրաէներգիայի զանգվածային անջատումից։ Reuters-ի փոխանցմամբ՝ տուժել են հատկապես երկրի մայրաքաղաք Սանտյագոն և հանքարդյունաբերական շրջանները։
Dpa գործակալությունը, վկայակոչելով Չիլիի ներքին գործերի և հասարակական անվտանգության նախարարությանը, պարզաբանել է, որ խոսքը վերաբերում է հյուսիսում Արիկա քաղաքից մինչև երկրի հարավում գտնվող Պուերտո Մոնտ քաղաքը ընկած տարածքին։ Տեղական La Tercera թերթն էլ հաղորդում է, որ Չիլիի տնային տնտեսությունների մոտ 80%-ը մնացել է առանց էլեկտրականության։
Փետրվարի 26-ի գիշերը Չիլիում արտակարգ դրություն է հայտարարվել հոսանքազրկման պատճառով, իսկ Սանտյագոյում պարետային ժամ է սահմանվել։ Սանտյագոյում հոսանքազրկման ֆոնին անջատվել է փողոցների լուսավորությունը, իսկ մետրոն դադարեցրել է աշխատանքը։ Էլեկտրաէներգիան կորել է նաև աշխարհի ամենամեծ պղնձի հանքաքարի հանքավայրում՝ Էսկոնդիդայում, գործակալությանը հայտնել է անանուն աղբյուրը: Պղնձի արդյունահանման պետական Codelco ընկերությունն իր հերթին հայտնել է, որ իր բոլոր հանքերը տուժել են հոսանքազրկման պատճառով:
Չիլիի ներքին գործերի նախարար Կարոլինա Տոայի խոսքով՝ միջադեպի պատճառ է դարձել երկրի հյուսիսում էլեկտրահաղորդման գծի խափանումը։ Նա բացառել է կիբերհարձակումը:
Թարգմանությունը՝ Տաթև Ֆռանգյանի
