02.08.2026 | 21:08
Շոգ եղանակին՝ առավել զգոնություն. ՍԱՏՄ-ի կոչը հանրային սննդի ոլորտի ներկայացուցիչներին և միջոցառումների կազմակերպիչներին
20 միլիարդ ներդրում` Կասկադ համալիրի վերակառուցման համար. կա հաղթող ընկերություն․ ՏԵՍԱՆՅՈՒԹ
Տնտեսություն
24.02.2025 | 11:24
«Կասկադ համալիրի վերակառուցման աշխատանքների հետ կապված հունվարի 17-ին հայտարարված մրցույթի արդյունքներն ամփոփվել են փետրվարի 17-ին․ հաղթող է ճանաչվել այն մասնակիցը, որն առաջարկել է Կասկադի վերակառուցման համար իրականացնել շուրջ 20 մլրդ 46 մլն դրամի ներդրում»,- գործակարգավարական նիստի ժամանակ զեկուցեց Երևանի քաղաքապետի խորհրդական Սոնա Թևանյանը։
Երևանի քաղաքապետարանը հաղթող ընկերության հետ կկնքի պայմանագիր, որով հնարավորություն կտրվի կառուցապատման թույլտվության հիման վրա իրականացնել Կասկադ համալիրի վերակառուցման աշխատանքները, որի արդյունքում համալիրը կստանա ամբողջական տեսք։ Աշխատանքների ավարտի համար սահմանվել է 5 տարի ժամանակ։
Երևանի քաղաքապետարանից մանրամասնում են, որ հաղթողը 4 ընկերություններից բաղկացած կոնսորցիում է, որի անունից հանդես է գալու «Ջի Թի Բի դիվելոփմենթ» ՍՊԸ-ն։
«Ծրագիրը նախատեսում է «Կասկադ» համալիրի անավարտ հատվածի կառուցում՝ ապահովելով մշակութային կոթողի ամբողջական, ավարտուն տեսքը և համալիրի կապը Հաղթանակի 50-ամյակի հուշարձանի հետ:
Աշխատանքներն իրականացվելու են ֆրանսիացի հեղինակավոր ճարտարապետ Ժան-Միշել Վիլմոտի ներկայացրած էսքիզի և դրանից բխող նախագծի հիման վրա:
-Կստեղծվեն շուրջ 1000 հոգու համար նախատեսված համերգասրահ,
– ժամանակակից արվեստի նոր թանգարան,
– արվեստանոցներ,
– ժամանցի և հանգստի գոտիներ:
Կառուցված բոլոր շինությունները, որոնք հագեցած են լինելու տեխնիկական անհրաժեշտ միջոցներով ու ենթակառուցվածքներով, ծրագրի ավարտին փոխանցվելու են համայնքին՝ որպես համայնքային սեփականություն:
Նախագիծն ամբողջությամբ նախատեսվում է ավարտել հինգ տարում»,- ասված է հաղորդագրությունում։
Մանրամասները՝ տեսանյութում։
