ՌԴ-ի և ԱՄՆ-ի պաշտոնյաները վերջին ամիսներին ոչ պաշտոնական հանդիպումներ են անցկացրել Շվեյցարիայում․ Reuters

ԱՄՆ-ի և Ռուսաստանի պաշտոնյաները վերջին ամիսներին մի քանի անգամ հանդիպել են Շվեյցարիայում՝ ուկրաինական պատերազմի վերաբերյալ ոչ պաշտոնական քննարկումների համար, այդ թվում՝ անցյալ շաբաթ։ Այս մասին Reuters-ին հայտնել են իրավիճակին ծանոթ երեք աղբյուրներ։

Նրանք բանակցությունները նկարագրել են որպես կողմնակի ուղի, որի որոշ շփումներ տեղի են ունեցել անցումային շրջանում՝ նոյեմբերի 5-ին նախագահական ընտրություններում Դոնալդ Թրամփի հաղթանակից հետո:

Թեև ներկաներն ունեցել են դիվանագիտական ​​և անվտանգության ոլորտի փորձ, նրանք պետական ​​պաշտոնյաներ չեն եղել։ Հստակ չէ՝ արդյո՞ք նրանք ուղարկվել են իրենց կառավարությունների կողմից, ասել են աղբյուրներից երկուսը: Նրանք հրաժարվել են նշել ներկաների ինքնությունը:

Մեկ այլ զրույցակից էլ ասել է, որ Թրամփի առնվազն փոքր թվով խորհրդականներ տեղյակ են եղել այդ հանդիպումների մասին։ Շատ այլ մանրամասներ մնում են անորոշ, այդ թվում՝ հանդիպումների օրակարգերը, ուկրաինացիների ներկայությունը և հանդիպումների մեկնարկի ժամը։ Սակայն նախկինում չբացահայտված հանդիպումներն ընդգծում են ԱՄՆ-ի և Ռուսաստանի կուլիսային ջանքերը Ուկրաինայում պատերազմին վերջ տալու ուղիներ փնտրելու համար, չնայած Թրամփի նախորդի՝ նախկին նախագահ Ջո Բայդենի օրոք պաշտոնական շփումների գրեթե սառեցմանը:

Աղբյուրներից մեկը Շվեյցարիայի բանակցությունները նկարագրել է որպես «Track Two»՝ «երկրորդ թրեքի» քննարկումներ․ դիվանագիտական ​​եզրույթ ոչ պաշտոնական երկխոսության համար, որն ուղղված է հաղորդակցության բարելավմանը և գաղափարների փոխանակմանը, այլ ոչ թե կոնկրետ առաջարկների մշակմանը:

Աղբյուրներից երկուսն ասել են նաև, որ առնվազն մեկ հանդիպում տեղի է ունեցել Ժնևում անցյալ շաբաթ Մյունխենի անվտանգության համաժողովի ժամանակ։

Սպիտակ տան Ազգային անվտանգության խորհուրդը, Ուկրաինայի կառավարությունը և Ռուսաստանի արտաքին գործերի նախարարությունը չեն պատասխանել լրատվամիջոցի մեկնաբանությունների խնդրանքներին։

Թարգմանությունը՝ Էմմա Չոբանյանի