Քաղաքականություն
20.02.2025 | 16:05
Կենտրոնական ընտրական հանձնաժողովն այսօրվա նիստում հաստատեց Գյումրիի համայնքապետի ընտրության օրն ու ընտրությունների կազմակերպման ժամանակացույցը։
ԿԸՀ նախագահի տեղակալ Նունե Հովհաննիսյանը տեղեկացրեց, որ Գյումրիում ավագանու արտահերթ ընտրությունները տեղի կունենան մարտի 30-ին։ Նա հրապարակեց ավագանու արտահերթ ընտրությունների անցկացման ժամանակացույցը։
«Փետրվարի 21-ից ընտրություններին մասնակցելու ցանկություն ունեցող կուսակցությունները և կուսակցութունների դաշինքները կարող են դիմել ԿԸՀ՝ գրանցման և ընտրական ցուցակի էլեկտրոնային եղանակով օգտահաշիվ ստանալու համար։ Գրանցման փաստաթղթերը կուսակցությունները և կուսակցությունների դաշինքները կարող են ներկայացնել մինչև մարտի 5-ը, ժամը 18։00-ը»,- ներկայացրեց Հովհաննիսյանը։
ԿԸՀ նախագահի տեղակալը հայտարարեց, որ քարոզարշավը կմեկնարկի մարտի 15-ին և կավարտվի մարտի 28-ին։ Նա նաև ասաց, որ ընտրողների ցուցակները տեղամասներում կփակցվեն և ընտրողների ռեգիստրի կայքում կհրապարակվեն մարտի 10-ին։
Հիշեցնենք, որ անցած տարի հոկտեմբերին Գյումրիում «Բալասանյան» դաշինքի ավագանու անդամները քաղաքապետ Վարդգես Սամսոնյանի գլխավորությամբ վայր դրեցին մանդատները։ Գյումրիի իշխող ուժն այդ որոշումն ընդունել էր դաշինքի հետ սերտորեն կապված նախկին քաղաքապետ Սամվել Բալասանյանի, նրա որդու և ևս երեք մերձավորների նկատմամբ քրեական հետապնդումից հետո։
Վերջիններս անցնում են Գյումրիի «Սև բերդ»-ի հարակից հողատարածքների օտարման գործով։ Դեկտեմբերին կառավարությունը որոշեց դադարացնել Գյումրիի ավագանու լիազորությունները։ ՔՊ-ն Գյումրիում դեկտեմբերի 8-ին, 9-ին և 10-ին նախնական ընտրություններ էր անցկացրել, որոնց արդյունքներով համայնքապետի պաշտոնակատար դարձավ Սարիկ Մինասյանը:
Այս պահի դրությամբ Գյումրիի ընտրություններին մասնակցելու մասին հայտարարել են ՔՊ թեկնածու Սարիկ Մինասյանը, Գյումրիի նախկին քաղաքապետ Վարդան Ղուկասյանը, ԱԺ պատգամավոր Մարտուն Գրիգորյանը, ինչպես նաև պրոդյուսեր Ռուբեն Մխիթարյանը, որն ընտրություններում գլխավորելու է «Իմ Հզոր Համայնք» կուսակցության ցուցակը։
Մանյա Պողոսյան
