Այս խայտառակ պրակտիկան պետք է վերացնել. Սաքունցը պահանջ ներկայացրեց․ ՏԵՍԱՆՅՈՒԹ

«Մեր պահանջն է, որ առաջին հերթին պետք է քաղաքական կամք դրսևորել և կողմնորոշվել՝ մենք մնում ենք Եվրոպայի խորհրդի որպես անդամ պետություն մարդու հիմնարար իրավունքների և կոնվենցիայի շրջանակներում, թե՞ այդ կոնվենցիան աղավաղում ենք՝ մնալով ԱՊՀ շրջանակները լքած կոնվենցիայի մաս»,- հրավիրված մամուլի ասուլիսի ժամանակ ասաց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը։

Հիշեցնենք՝ երեկ գրասենյակն ահազանգել էր, որ 2025թ․-ի փետրվարի 13-ին ՀՔԱՎ գրասենյակի իրավական պաշտպանության ներքո գտնվող Ռոման Շկլովերին զանգահարել են ՀՀ ոստիկանության Երևան քաղաքի Մետրոպոլիտենի պահպանության բաժնից՝ հրավիրել բաժանմունք որոշ պարզաբանումներ ստանալու նպատակով։ Ռ․ Շկլովերը նույն պահին կապվել է ՀՔԱ Վանաձորի գրասենյակի հետ և Կազմակերպության փաստաբան Սամսոն Գալստյանի ուղեկցությամբ ներկայացել բաժին։ Ոստիկանության բաժնում հայտնել են, որ Ռուսաստանի Դաշնությունում Ռ․ Շկլովերի դեմ քրեական գործ կա հարուցված, բայց դեռևս խափանման միջոց ընտրված չէ։Այդ ընթացքում փաստաբան Ս․ Գալստյանի ներկայությամբ ՀՀ ոստիկանության բաժին  են ներխուժել Ռուսաստանի Դաշնության անվտանգային մարմինների ներկայացուցիչներ, ամենայն հավանականությամբ, Անվտանգության դաշնային ծառայության՝ «ФСБ» -ի աշխատակիցներ և ՀՀ ոստիկանների ներկայությամբ Ռ․Շկլովերին փորձել են համոզել ինքնակամ գնալ իրենց հետ և հանձնվել ՌԴ-ին, խոստանալով, որ   «իր հետ ամեն ինչ լավ կլինի»։  ՀՔԱ Վանաձորի գրասենյակի փաստաբան Ս․Գալստյանը թույլ չի տվել նման ապօրնություն, և Ռ․Շկլովերն ինքն էլ հրաժարվել է «ФСБ» -ի աշխատակիցների հետ համագործակցելուց։

Մանրամասները՝ տեսանյութում։