19.02.2026 | 18:17
«Օրենքը պետք է հաղթանակի». Բրիտանիայի Չարլզ III թագավորը` եղբոր ձերբակալության մասին
Նիդերլանդների խորհրդարանը հավանություն է տվել Ուկրաինա խաղաղապահներ ուղարկելու բանաձևին
Քաղաքականություն
19.02.2025 | 17:30
Նիդերլանդների խորհրդարանի Ներկայացուցիչների պալատը ճնշող մեծամասնությամբ բանաձև է ընդունել Ուկրաինա խաղաղապահ ուժերի հնարավոր տեղակայման մասին՝ Ռուսաստանի հետ հրադադարի դեպքում։ Այս մասին հայտնում է NOS հեռուստաալիքը։
Երկրի խորհրդարանը կոչ է անում կառավարությանը «կառուցողական դիրքորոշում» ընդունել Ուկրաինայում «հետպատերազմյան խաղաղապահ ուժերին» Նիդերլանդների մասնակցության հարցում, ասվում է փաստաթղթում։ Պատգամավորներն ընդգծել են, որ իրենք տեսնում են թագավորության ակտիվ դերակատարումը Մոսկվայի և Կիևի միջև հրադադարի դեպքում կայունության ապահովման գործում։
Երկրի վարչապետ Դիկ Շուֆի խոսքով՝ երկրի իշխանությունները բաց են երկխոսության համար՝ կապված Ուկրաինայում հնարավոր խաղաղապահ առաքելության հետ, որն ագրեսիայի է ենթարկվել Ռուսաստանի Դաշնության կողմից։
Միաժամանակ, Նիդերլանդների ծայրահեղ աջ Ազատություն կուսակցության (PVV) առաջնորդ Գերտ Վիլդերսը բանաձևի քննարկման ժամանակ հայտարարել է, որ չի աջակցելու թագավորության զորքերն Ուկրաինա ուղարկելուն։ Նա նշել է, որ «չպետք է գերագնահատել Ռուսաստանի սպառնալիքը»։
Կանաչների ձախ լեյբորիստական կուսակցությունն (GroenLinks-PvdA) աջակցել է զորքեր ուղարկելու առաջարկին, թեև դաշինքի խոսնակն ասել է, որ կարծում է՝ «դեռ վաղ է քննարկել» հոլանդական զորակազմն Ուկրաինայում տեղակայելու հարցը:
Զորքեր ուղարկելու մասին վերջնական որոշումը կկայացնի երկրի կառավարությունը, փոխանցում է NOS-ը։
Թարգմանությունը՝ Տաթև Ֆռանգյանի
