«Այն մարդը, որն ասում է՝ իր միակ գործը փող աշխատելն է, ինձ համար բիզնեսմեն չէ». ապաքաղաքական զրույց Հայկ Շեկյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է «Շտիգեն» ընկերությունների խմբի տնօրեն, տնտեսագիտության թեկնածու Հայկ Շեկյանը:

Նրա կարծիքով՝ կորպորատիվ ազգային պատասխանատվությունը, որն ընկերության գործունեության կարևոր մասն է, բիզնեսի պարտականությունն է՝ սնել ազգային արժեքները: Ազգայինը, ըստ հաղորդման հյուրի, դրսևորվում է այն դեպքում, երբ ցանկացած հայի, անկախ նրա որակներից, դու ընկալում ես որպես քո աշխարհի բջիջներից մեկը: Այստեղից մեր ազգային բուրժուազիան կազմում են այն մարդիկ, որոնց համար աշխարհի կենտրոնը Հայաստանն է:

«Շտիգեն» ընկերության տնօրենը վստահ է, որ բիզնեսը պետք է «մասնավոր-հանրային» համագործակցության մեջ կարևորագույն մասնակցություն ունենա: Գործարարը չպիտի հեռանա հանրային խնդիրներից, ասի՝ «սա իմ գործը չէ»:

«Այն մարդը, որն ասում է՝ իր միակ գործը փող աշխատելն է, ինձ համար բիզնեսմեն չէ։ Գործարարը, իմ կարծիքով, պետք է ունենա որոշակի առաքինի առանցք»,- ասում է Հայկ Շեկյանը։

«Շտիգեն» ընկեկերությունը, որը մասնագիտացած է այլընտրանքային էներգիայի արտադրության բնագավառում, վերջերս սկսել է թողարկել պարտատոմսեր: Դա, ըստ գործարարի, նույնպես ընդհանուր բարիքի գիտակցման շրջանակում է: Հաղորդման հյուրը պատմում է, որ նրան շատ են մոտենում մարդիկ, որոնք ցանկանում են իրենց լուման ունենալ ներմուծվող գազից և նավթից անկախ լինելու գործում: Պարտատոմսերը հենց այդ հնարավորությունն են ստեղծում:

Մանրամասները՝ տեսանյութում:

Արամ Աբրահամյան