Թրամփն Ուկրաինայում ընտրություններ անցկացնելու կոչ է արել և չի բացառել մինչև ամսվա վերջ Պուտինի հետ հանդիպումը

ԱՄՆ նախագահ Դոնալդ Թրամփը Էր Ռիադում ռուսական և ուկրաինական պատվիրակությունների միջև բանակցություններից հետո քննադատել է Ուկրաինային՝ հայտարարելով, որ հիասթափված է Կիևի արձագանքից, որը չի ներգրավվել խորհրդակցություններում, գրում է BBC-ի ռուսական ծառայությունը։

Ավելին, Թրամփն իր մեկնաբանության մեջ փաստացի մեղադրել է Ուկրաինային հակամարտությունը սկսելու համար։

«Ես լսել եմ, որ նրանք վրդովված են, որ տեղ չեն ունեցել բանակցությունների սեղանի շուրջ, բայց նրանք ունեին երեք տարի ժամանակ և դրանից առաջ։ Չպետք է սկսեիք։ Դա կարող էր շատ հեշտությամբ կարգավորվել»,- ասել է նա՝ պատասխանելով BBC-ի թղթակցի հարցին Ֆլորիդայում գտնվող իր նստավայրում։

Ուկրաինայի նախագահ Վլադիմիր Զելենսկին նախօրեին հայտարարել է, որ Ռիադում ռուս-ամերիկյան հանդիպումն անակնկալ էր Կիևի համար։ Նա ևս մեկ անգամ կրկնել է, որ պատերազմը դադարեցնելու որոշում չի կարող կայացվել առանց Ուկրաինայի։

Թրամփը, միաժամանակ, հայտարարել է, թե  Զելենսկիի վարկանիշն «իջել է 4%-ի», և երկրին ընտրություններ են պետք։ Այսպիսով, Սպիտակ տան ղեկավարը, ըստ էության, կրկնել է ՌԴ նախագահ Վլադիմիր Պուտինի հիմնական թեզերից մեկը։ ԱՄՆ նախագահը նաև ասել է, որ «շատ ավելի վստահ է» Սաուդյան Արաբիայում բանակցություններից հետո խաղաղ համաձայնագրի հասնելու հարցում:

«Բանակցությունները շատ լավ են անցել։ Ռուսաստանը ցանկանում է ինչ-որ բան անել։ Նրանք ցանկանում են դադարեցնել վայրի բարբարոսությունը։Կարծում եմ, որ ուժ ունեմ վերջ տալու այս պատերազմին, և կարծում եմ, որ ամեն ինչ շատ լավ է ընթանում»,- ասել է Թրամփը։

Նա նաև հայտարարել է, որ աջակցում է եվրոպացի խաղաղապահների Ուկրաինա ուղարկելուն, եթե համաձայնություն ձեռք բերվի դադարեցնել պատերազմը:

«Եթե նրանք ցանկանում են դա անել, դա հիանալի է, ես կողմ եմ դրան»,- նշել է նա։

Թրամփը նաև չի բացառել, որ կարող է Վլադիմիր Պուտինի հետ հանդիպել մինչև փետրվարի վերջ։

Թարգմանությունը՝ Էմմա Չոբանյանի