06.12.2025 | 22:41
Պետք է շարունակենք մեր ծառայությունը բերել մեր ժողովրդին. Գարեգին Բ-ն` Փաշինյանի քայլերի մասին. ՏԵՍԱՆՅՈՒԹ
Ստամբուլի ընդդիմադիր քաղաքապետին մինչև 7 տարվա ազատազրկում է սպառնում
Քաղաքականություն
13.02.2025 | 15:52
Ստամբուլի ընդդիմադիր քաղաքապետ Էքրեմ Իմամօղլուին պաշտոնապես մեղադրանք է առաջադրվել նահանգի գլխավոր դատախազի հասցեին հնչեցրած արտահայտությունների համար, գրում է Bianet-ը։
Ստամբուլի 14-րդ ծանր քրեական դատարանը գործով առաջին նիստը նշանակել է ապրիլի 14-ին։ Քաղաքապետին սպառնում է ազատազրկում 2 տարի 8 ամսից մինչև 7 տարի 4 ամիս ժամկետով, ինչպես նաև քաղաքական գործունեության արգելք՝ «ծառայողական պարտականությունների կատարման հետ կապված պաշտոնատար անձին վիրավորելու», «սպառնալիքի» և «ահաբեկչության դեմ պայքարող պաշտոնյային ահաբեկչական խմբավորումների թիրախ նշանակելու» համար։
Գործը հիմնված է անցյալ ամսվա ելույթի ժամանակ Իմամօղլուի արած մեկնաբանությունների վրա, որտեղ նա դիմել էր Ստամբուլի գլխավոր դատախազ Աքըն Գյուրլեքին։ Գյուրլեքը, որը նախկինում արդարադատության փոխնախարար է եղել և նախագահող դատավոր մի քանի քաղաքական գործերով, խիստ քննադատության է ենթարկվել գլխավոր ընդդիմադիր Ժողովրդահանրապետական կուսակցության (CHP) կողմից՝ կառավարության քաղաքական օրակարգին համահունչ գործելու համար: CHP-ի գործիչները, այդ թվում՝ Իմամօղլուն, Գյուրլեքին նույնպես պատասխանատու են համարում կուսակցության կողմից ղեկավարվող Ստամբուլի շրջանային քաղաքապետարանների դեմ ուղղված մի շարք հետաքննությունների համար։
Մեղադրական եզրակացության մեջ, որում Գյուրլեքը տուժող է ճանաչվել, ասվում է, որ Իմամօղլուի հայտարարությունները փորձ են «ճնշելու դատական համակարգը» և «ազդելու դատարանի որոշումների վրա»՝ օգտագործելով նրա քաղաքական կարգավիճակը։ Դատախազները նաև պնդել են, թե Գյուրլեքը հայտնի էր որպես «ահաբեկչական կազմակերպությունների» թիրախ՝ իր նախկին պարտականությունների պատճառով, իսկ Իմամօղլուն իր ելույթում բացահայտել է նրան որպես նման խմբերի թիրախ։
«Իմամօղլուի մեկնաբանությունները ներառում էին տարրեր, որոնք կարող էին վտանգի ենթարկել Գուրլեքին և նրա ընտանիքին»,- ասվում է մեղադրական եզրակացության մեջ:
Վերջին ամիսներին Իմամօղլուն և CHP-ի մյուս գործիչները բախվում են մի քանի հետաքննությունների՝ ահաբեկչության հետ կապված հանցագործություններից մինչև պետական մրցույթներում ենթադրյալ խախտումներ:
Ինքը՝ Իմամօղլուն, ենթարկվում է մեկ այլ հետաքննության ևս՝ «դատական համակարգի վրա ազդելու փորձի» համար՝ կապված նրա այն բացահայտման հետ, որ նույն փորձագետը ներգրավված է եղել մի քանի հետաքննություններում, որոնք ուղղված են եղել CHP-ի կողմից վերահսկվող մունիցիպալիտետների դեմ։
Հավելենք, որ խորհրդարանական և նախագահական ընտրությունները Թուրքիայում նախատեսված են 2028 թվականին, սակայն ընդդիմադիր CHP-ն ուժեղացնում է ճնշումը՝ արտահերթ ընտրությունների անցկացման համար։
Նախագահական ընտրություններում Թուրքիայի նախագահ Ռեջեփ Թայիփ Էրդողանի գլխավոր մրցակիցը համարվում է Էքրեմ Իմամօղլուն։
Թարգմանությունը՝ Էմմա Չոբանյանի
