06.10.2026 | 16:12
Հայաստանի Մ-20 հավաքականը 11-մետրանոցներով պարտվեց Սաուդյան Արաբիային. ՏԵՍԱՆՅՈՒԹ
Հանրային պաշտպանների թիվը կրճատում են, անվճար իրավաբանական օգնությունը՝ հարկում. ՏԵՍԱՆՅՈՒԹ
Հասարակություն
10.02.2025 | 14:17
Հարկային օրենսգրքում տեղի ունեցած փոփոխություններն անհնարին են դարձնում քաղաքացիներին անվճար իրավաբանական օգնություն ցուցաբերելը, բայց միևնույն ժամանակ հանրային պաշտպանների թիվը չի ավելացվում։ Այսօր Փաստաբանների պալատում հրավիրված ասուլիսի ժամանակ Փաստաբանների պալատի նախագահ Սիմոն Բաբայանը նշեց, որ 2024 թվականին Հանրային պաշտպանի գրասենյակում գործերի թիվը 50%-ով աճել էր, ուստի հանրային պաշտպանների թիվը 15-ով ավելացել է, սակայն 2025-ին կրկին 11 հաստիք կրճատվել է՝ չնայած այն հանգամանքին, որ գրասենյակի կողմից մատուցվող ծառայությունների թիվը ոչ միայն չի նվազել, այլ նաև շեշտակի աճել է։
Բաբայանը հիշեցրեց, որ արդեն մի քանի տարի է, ինչ իրենք մարտի 8-ի կապակցությամբ անվճար իրավաբանական օգնություն են կազմակերպում բոլոր կանանց համար։ Բողոքի ակցիաների և այլ հրապարակային միջոցառումների ժամանակ փաստաբանները մշտապես անվճար ստանձնում են ոստիկանություն տարված քաղաքացիների շահերի պաշտպանությունը։ Պալատում նաև մատուցվել են Արցախից բռնի տեղահանված անձանց իրավունքների պաշտպանությանն ուղղված ծառայություններ։
Լրագրողների հարցին՝ այսինքն՝ այսուհետ այդպիսի միջոցառումներ չե՞ն լինի, Փաստաբանների պալատի նախագահ Սիմոն Բաբայանը պատասխանեց, թե ինքը չի ասում, թե չի լինի։ Փաստաբանների ակադեմիայի ռեկտոր Արա Զոհրաբյանն էլ կես կատակ-կես լուրջ հավելեց՝ կլինեն ակցիայի տեսքով։
Այսօր Փաստաբանների ժողովի վերջում փաստաբանները պատրաստվում են հայտարարություն ընդունել հարկային օրենսգրքում տեղի ունեցած փոփոխությունների վերաբերյալ։ Մինչ այդ հիշեցրին, որ նաև կառավարությանը պահանջագիր են ներկայացրել՝ կապված փոփոխությունների առաջացրած խնդիրների հետ, և կախված Կառավարության պատասխանից, կպլանավորեն իրենց բողոքի հետագա գործողությունները։
Թե ինչ գործողությունների մասին է խոսքը, այս պահին Պալատից չեն բացահայտում։
Արաքս Մամուլյան
