13.04.2026 | 22:05
«Որոշումները չեն կարող վավեր համարվել»․ ծանրամարտի ֆեդերացիան՝ ՀԱՕԿ-ի մասին
Հետախուզման մեջ գտնվող Վիգեն Սարգսյանի պաշտպանը միջնորդեց կասեցնել նրա վերաբերյալ ապօրինի գույքի գործի քննությունը․ ՏԵՍԱՆՅՈՒԹ
Հասարակություն
05.02.2025 | 19:29
Դատախազությունը պահանջում է Պաշտպանության նախկին նախարար Վիգեն Սարգսյանից և կնոջից բռնագանձել բնակարաններ, դրամական միջոցներ և ենթադրյալ ապօրինի գնահատված այլ գույք։ Հակակոռուպցիոն դատարանում այսօր նշանակված էր Սարգսյանի գործով դատական նիստ։
Սարգսյանը բացի ենթադրյալ ապօրինի գործից անցնում է նաև քրեական գործերով, 2019 թվականից հետախուզման մեջ է։
Այսօրվա դատական նիստի ընթացքում նրա պաշտպան Արմեն Հարությունյանը միջնորդեց կասեցնել ապօրինի ծագում ունեցող գույքի բռնագանձման վարույթը՝ մինչև Սարգսյանի վերաբերյալ քրեական գործերով դատական ակտերի առկայությունը։
Պաշտպանը նշեց, որ ապօրինի ծագում ունեցող գույքի բռնագանձման գործով քննության առարկա են այն նույն հանգամանքները, որոնք քրեական գործով են քննության առարկա։ Պաշտպանը նաև նշեց, որ քրեական գործի շրջանակներում իրենց իրավունք չունեն վկաների հետ հանդիպումներ ունենալու, ինչը բարդացնում է նույն հանգամանքների վերաբերյալ քաղաքացիական գործի շրջանակներում իրենց կողմից փաստահավաք գործունեություն իրականացնելուն։
Հիշեցնենք, որ Վիգեն Սարգսյանի և կնոջ ենթադրյալ ապօրինի գույքի բռնագանձման գործը դատարան է ուղարկվել 2024-ի մայիսին։ Հայցադիմումի վերաբերյալ Դատախազության կողմից տարածված հաղորդագրության համաձայն՝
Դատախազությունը պահանջում է Վիգեն Սարգսյանից և և կնոջից բռնագանձել․
- Անշարժ գույք Երևանի կենտրոնում, իսկ անհնարինության դեպքում՝ գույքի միջին շուկայական արժեքը՝ 181 մլն 125 հազար դրամ,
- ԱՄՆ Մասաչուսեթս նահանգում գտնվող բնակելի տարածքը, իսկ անհնարինության դեպքում՝ գույքի ձեռքբերման արժեքը՝ 2 մլն 50 հազար ԱՄՆ դոլարին համարժեք 940 մլն 909 հազար դրամ,
- 255 մլն 454 հազար դրամ՝ որպես ապօրինի դրամական միջոցների մնացորդ
- 172 մլն 486 հազար դրամ, որը, ըստ Դատախազության, չի հիմնավորվում անձի օրինական եկամուտներով, ունի ապօրինի ծագում և հնարավոր չէ բռնագանձել, քանի որ 2004-2022 թվականների ընթացքում փոխանցվել է բարեխիղճ ձեռքբերողի և/կամ հնարավոր չէ նույնականացնել՝ բռնագանձումը տարածելով նաև համատեղ կյանքի ընթացքում Լ.Գ.-ի անվամբ առևտրային բանկերում առկա դրամական միջոցների, գույքերի վրա:
Մանրամասները՝ տեսանյութում
Արաքս Մամուլյան
