13.01.2026 | 18:44
Պորտուգալիայի հավաքականի ֆուտբոլիստը միացավ «Բարսելոնային»
Փաստաբանները Կառավարությունից պահանջում են փաստաբանական անվճար ծառայություններն ազատել ԱԱՀ-ից
Հասարակություն
05.02.2025 | 12:22
Փաստաբանները 2025 թվականի փետրվարի 10-ին բողոքի ակցիա կիրականացնեն՝ հրաժարվելով Հայաստանի Հանրապետության պետական մարմիններում (այդ թվում՝ դատարաններում, նախաքննության մարմիններում) պաշտպանություն կամ ներկայացուցչություն իրականացնելուց․ այս մասին ֆեյսբուքյան գրառմամբ տեղեկացրել է փաստաբան Արա Ղարագյոզյանը։
«ՀՀ կառավարությունից պահանջում ենք օրենսդրական նախաձեռնությամբ հանդես գալ և «Հայաստանի Հանրապետության հարկային օրենսգրքում լրացումներ կատարելու մասին» օրենքի նախագիծը ՀՀ ազգային ժողով ուղարկելու միջոցով՝ փաստաբանական գործունեություն համարվող ծառայությունների մատուցումը, անվճար (անհատույց) և կամավոր անհատույց իրավաբանական օգնության տրամադրումը ազատել ավելացված արժեքի հարկից»,- գրել է փաստաբանը։
Հիշեցնենք՝ այս տարվա հունվարի 1-ից փաստաբանական ծառայությունների հարկերը շեշտակի ավելացվեց. 5 տոկոս շրջանառության հարկից տեղափոխություն եղավ ավելացված արժեքի հարկման դաշտ, ինչի հետևանքով փաստաբանական ծառայություններ մատուցողների համար ԱԱՀ-ն կազմեց 20, իսկ շահութահարկը՝ 18 տոկոս։ Մասնավորապես, փաստաբանների մի մասը, որոնց տարեկան շրջանառությունն անցնում է 119 միլիոն դրամը, մինչև հունվարի 1-ը վճարում էին թե՛ ավելացված արժեքի հարկ, թե՛ շահութահարկ։ Սրանից պակաս վաստակողները, որոնք մեծամասնություն էին, վճարում էին ընդամենը 5 տոկոս շրջանառության հարկ։
2025-ի սկզբից բոլորը սկսեցին հարկվել նույն սկզբունքով։ Նախորդ տարի ընդունված այս փոփոխությունների շուրջ մեծ դժգոհություններ և բողոքի ալիք բարձրացավ, ընդհուպ՝ մեկօրյա գործադուլ։ Փաստաբանները նշում էին, որ սա իրենց վրա չի ազդելու, այլ իրենց ծառայություններից օգտվող քաղաքացիների, քանի որ հարկերի ավելացման դեպքում բարձրանալու է իրենց մատուցած ծառայությունների արժեքը։
