Քաղաքականություն
04.02.2025 | 18:20
Թուրքիայի քրդամետ Ժողովուրդների իրավահավասարություն և ժողովրդավարություն (DEM) կուսակցությունը հայտարարել է, որ Քուրդիստանի աշխատավորական կուսակցության (PKK) բանտարկված առաջնորդ Աբդուլլահ Օջալանը շուտով «պատմական կոչ» կանի՝ թուրքական պետության հետ տասնամյակներ տևած հակամարտությունը դադարեցնելու քաղաքական ջանքերի ֆոնին: Այս մասին խորհրդարանում կուսակցության խմբակցությունում հայտարարել է DEM կուսակցության համանախագահ Թունջեր Բաքիրխանը, փոխանցում է Bianet-ը։
«Ընդդիմությունը և հասարակությունը ցանկանում են, որ սա վերաճի խաղաղ գործընթացի։ Մենք չպետք է բաց թողնենք այս պատմական հնարավորությունը։ Թունավոր լեզուն կարող է հետ մղել այս պատմական գործընթացը։ Մենք ձգտում ենք քրդական հարցի լուծում գտնել ժողովրդավարության և օրենքի միջոցով։ Մինչ Օջալանը կոչ է անում հակամարտությունները բերել օրինական հիմքի, կառավարության լեզուն պետք է համապատասխանի դրան։ Պարոն Օջալանը պատրաստվում է առաջիկա օրերին պատմական կոչ անել քրդական խնդրի արմատական և մշտական լուծման համար՝ ժողովրդավարական Թուրքիայի կառուցման նպաակով։ Մենք աջակցում ենք այդ կոչին և կանգնած ենք դրա թիկունքում: Կոչ ենք անում կառավարությանը կատարել իր դերը այս պատմական կոչին համապատասխան»,- ասել է նա։
DEM-ի ներկայացուցիչը նշել է նաև, որ գնդակն այժմ Թուրքիայի նախագահ Ռեջեփ Թայիփ Էրդողանի դաշտում է։
«Միլիոնավոր մարդիկ հիմա սպասում են ժողովրդավարացման գալուն, մենք սպասում ենք վստահության ամրապնդման քայլերի։ Դանդաղելու փոխարեն պատմության մեջ մտեք որպես համարձակ առաջնորդ: Մենք կողմ ենք հավասար կյանքին։ Մեր ուղղությունն ու ուղենիշը խաղաղության և ժողովրդավարության ճանապարհն է։ Անկախ ամեն ինչից՝ մենք շարունակելու ենք քաջությամբ քայլել այս ճանապարհով»,- ասել է Բաքիրխանը:
Հանդիպումից հետո լրագրողների հարցերին պատասխանելով՝ նա Աբդուլլահ Օջալանի կոչի մասին ասել է. «Դա կարող է լինել մինչև փետրվարի 15-ը կամ դրանից հետո»:
Հարցին՝ կրկին այցելելո՞ւ են Օջալանին, Բաքիրխանը պատասխանել է․ «Դեռ հստակություն չկա, սպասում ենք զանգի»։
Հավելենք, որ ավելի վաղ թուրքական լրատվամիջոցները հայտնել էին, որ Օջալանը կարող է դիմել իր կողմնակիցներին՝ զենքերը վայր դնելու և Թուրքիայի հետ երկարամյա զինված առճակատումը դադարեցնելու կոչով։
Թարգմանությունը՝ Էմմա Չոբանյանի
