Բաքվի դատարանը հրաժարվել է փոխել ԼՂ նախկին պաշտոնյաների խափանման միջոցը

Բաքվի ռազմական դատարանում Լեռնային Ղարաբաղի նախկին ռազմաքաղաքական ղեկավարության անդամների նկատմամբ հունվարի 27-ին տեղի ունեցած ապօրինի դատավարության հերթական նիստի արդյունքներով՝ դատարանը հրաժարվել է փոխել ԼՂ-ի նախկին պաշտոնյաների խափանման միջոցը տնային կալանքով: «Արմենպրես»-ի փոխանցմամբ՝ այս մասին հայտնում են ադրբեջանական լրատվամիջոցները՝ հիշեցնելով, որ նիստի ժամանակ նրանք՝ բացի Արայիկ Հարությունյանից, դիմել էին դատարանին՝ խափանման միջոցը տնային կալանքով փոխարինելու միջնորդությամբ։Բացի այդ,

նշվում է, որ Բաքվի ռազմական դատարանը նաև մերժել է քրեական գործի նյութերի ուսումնասիրման համար լրացուցիչ ժամանակ տրամադրելու մասին Ռուբեն Վարդանյանի դիմումը։Հաղորդվում է, որ դատական հաջորդ նիստը տեղի է ունենալու փետրվարի 6-ին:Հունվարի 27-ին մեկնարկել է նաև ԼՂ-ի նախկին պետնախարար Ռուբեն Վարդանյանի նկատմամբ շինծու դատավարության հերթական նիստը՝ ԼՂ-ի նախկին նախագահ Արայիկ Հարությունյանի և մյուս պաշտոնյաների դատավարություններից առանձին:

Հայաստանի Հանրապետության վարչապետ Նիկոլ Փաշինյանը հունվարի 25-ին տված հարցազրույցում հայտարարել էր, որ Երևանը հետախուզական տվյալներ ունի, որ Ադրբեջանը Բաքվում պահվող հայ գերիների նկատմամբ հոգեներգործուն արգելված միջոցներ է կիրառում, որպեսզի տարածաշրջանային էսկալացիաները հրահրելուն ուղղված խոսույթներ, ցուցմունքներ կորզի։

Ադրբեջանն ապօրինի ձերբակալել և շինծու մեղադրանքներ է առաջադրել Լեռնային Ղարաբաղի նախկին նախագահներ Արկադի Ղուկասյանին, Բակո Սահակյանին, Արայիկ Հարությունյանին, Լեռնային Ղարաբաղի Ազգային ժողովի պաշտոնը զբաղեցրած Դավիթ Իշխանյանին, արտաքին գործերի նախկին նախարար Դավիթ Բաբայանին, Պաշտպանության նախկին նախարար Լևոն Մնացականյանին, Պաշտպանության նախարարի նախկին տեղակալ Դավիթ Մանուկյանին, նախկին պետնախարար Ռուբեն Վարդանյանին։ Կեղծ մեղադրանքներ են առաջադրվել նաև Վասիլի Բեգլարյանին, Էրիկ Ղազարյանին, Դավիթ Ալահվերդյանին, Գուրգեն Ստեփանյանին, Լևոն Բալայանին, Մադաթ Բաբայանին, Գարիկ Մարտիրոսյանին, Մելիքսեթ Փաշայանին։ Ռուբեն Վարդանյանի նկատմամբ շինծու քրեական գործն անջատվել է մյուսների գործից, դատաքննությունն անցկացվել է առանձին։ Թե Ռուբեն Վարդանյանի, թե մյուս շինծու մեղադրյալների գործով դատական նիստն անցկացվել է հունվարի 17-ին։ Մյուս մեղադրյալների գործով ևս մեկ նիստ կայացել էր հունվարի 21-ին։