30.04.2026 | 10:10
Դրամն արժևորվել է․ արտարժույթների փոխարժեքները՝ ապրիլի 30-ի դրությամբ
Սիրիան նվազեցնում է թուրքական 269 ապրանքների մաքսատուրքերը՝ թուլացնելու Անկարայի հետ առևտրային լարվածությունը
Քաղաքականություն
27.01.2025 | 22:44
Սիրիան նվազեցրել է թուրքական ապրանքների մաքսատուրքերը՝ անցյալ շաբաթ թուրքական պատվիրակության հետ խորհրդակցություններից հետո։ Այս մասին հայտարարել է Թուրքիայի առևտրի նախարար Օմեր Բոլաթը, գրում է Middle East Eye-ը։
Այս ամսվա սկզբին Սիրիայի նոր կառավարությունը մինչև 300 տոկոսով բարձրացրել էր մաքսատուրքերը թուրքական ապրանքների համար: Այս քայլը հանգեցրել էր Թուրքիայի հետ առևտրի ամբողջական դադարեցմանը, ինչը հիասթափություն էր առաջացրել թուրք արտահանողների և սիրիացի որոշ գործարարների շրջանում: Թուրքիայից Սիրիա տարեկան արտահանումը կազմում է մոտ 2 մլրդ դոլար։
Անցյալ ուրբաթ Թուրքիայի առևտրի նախարարությունը հայտարարել էր, որ Դամասկոսը համաձայնել է վերանայել թուրքական արտահանման համար կիրառվող մաքսատուրքերը՝ առաջիկա շաբաթների ընթացքում խափանումները վերացնելու և առևտուրը վերականգնելու համար։
Բոլաթն ափսոսանք է հայտնել, որ հունվարի 11-ին Սիրիայի կողմից ներդրված մաքսային ռեժիմը, որը նախատեսված էր որպես «ընդհանուր և միասնական համակարգ ամբողջ աշխարհի համար», սխալ է մեկնաբանվել որոշ խմբերի կողմից։
«Այս շաբաթ Սիրիան որոշել է նվազեցնել մաքսատուրքերը 269 ապրանքների համար, ներառյալ՝ թուրքական հիմնական արտահանումները, ինչպիսիք են հավի միսը, ձուն, ալյուրը, եգիպտացորենը, կաթը, սերուցքը, երկաթը, պողպատը և հիգիենայի ապրանքները»,- ասել է Բոլաթը։
Թարգմանությունը՝ Էմմա Չոբանյանի
