Թրամփը կոչ է անում «մաքրել» Գազան և պաղեստինցիներին տեղափոխել Եգիպտոս ու Հորդանան

ԱՄՆ նախագահ Դոնալդ Թրամփի առաջարկը, որ Եգիպտոսը և Հորդանանը ընդունեն պատերազմից ավերված Գազայի հատվածի պաղեստինցիներին, հավանաբար կարժանանա ԱՄՆ երկու դաշնակիցների և հենց պաղեստինցիների կոշտ «ոչ»-ին․ գրում է The Associated Press-ը։

Թրամփը շաբաթ օրը հանդես եկավ այդ գաղափարով՝ ասելով, որ կոչ կանի արաբական երկու երկրների ղեկավարներին ընդունել Գազայի անօթևան բնակչությանը՝ նշելով, որ Գազան ներկայումս «քանդված վայր» է, և անհրաժեշտ է «մաքրել» այն: Նա հավելել է, որ Գազայի բնակչության տեղահանումը «կարող է լինել ժամանակավոր կամ երկարաժամկետ»։

«Այժմ դա բառացիորեն քանդված վայր է»,- ասել է Թրամփը՝ նկատի ունենալով ՀԱՄԱՍ-ի դեմ Իսրայելի 15-ամսյա ռազմական արշավի հետևանքով առաջացած զանգվածային ավերածությունները։

Թրամփի այս առաջարկը հանդիպել է պաղեստինյան խմբերի և արաբական երկրների դիմադրությանը։ Հորդանանն արդեն հայտարարել է, որ կտրականապես մերժում է այս գաղափարը։ Պաղեստինցիները մտահոգված են, որ այսպիսի տեղափոխությունը կարող է հանգեցնել իրենց մշտական տեղահանմանը՝ հիշեցնելով 1948 թվականի Նաքբայի իրադարձությունները, երբ շատերը ստիպված էին լքել իրենց տները և չեն կարողացել վերադառնալ։

Եգիպտոսն ու Հորդանանն աջակցում են պաղեստինյան պետության ստեղծմանը օկուպացված տարածքներում և մտահոգված են, որ Գազայի բնակչության վերաբնակեցումը այլ վայրերում կարող է խոչընդոտել այս նպատակին։ Բացի այդ, անվտանգության հետ կապված մտահոգություններ կան․  փախստականների հետ միասին կարող են տեղափոխվել նաև զինված խմբավորումներ։