ԵՄ դիվանագիտության ղեկավարը Թուրքիան ռազմավարական գործընկեր է անվանել

Եվրամիության դիվանագիտության ղեկավար Կայա Կալլասը Անկարա կատարելիք ​​այցից առաջ Թուրքիան բնութագրել է որպես «ռազմավարական նշանակության գործընկեր»՝ ընդգծելով ընդլայնված համագործակցության հնարավորությունները, միաժամանակ, ընդունելով հարաբերություններում առկա մշտական ​​մարտահրավերները: Այս մասին նա ասել է թուրքական պետական Anadolu գործակալության հետ զրույցում՝ հունվարի 24-ի այցից առաջ, գրում է Turkiye today-ը։

«Վաղուց ժամանակն է այցելել Թուրքիա, և ես դա կանեմ իմ մանդատի առաջին շրջանում։ Մենք բազմաթիվ խնդիրներ ունենք։ Այսպիսով, մենք կարող ենք քննարկել տարածաշրջանային անվտանգությունը, ինչպես նաև համագործակցության տարբեր կետեր, ինչպիսին է էներգետիկ համագործակցությունը»,- ասել է Կալլասը։

Հաստատելով Թուրքիայի՝ որպես ԵՄ թեկնածու երկրի շարունակական կարգավիճակը՝ նա ընդունել է, որ կան զգալի խոչընդոտներ անդամակցության գործընթացում։ Ըստ նրա՝ դիվանագիտական ​​հարաբերությունները բախվում են մի քանի մարտահրավերների, ներառյալ՝ Կիպրոսի, մարդու իրավունքների և օրենքի գերակայության վերաբերյալ մտահոգությունները, որոնք շարունակում են մնալ երկու կողմերի միջև քննարկման առանցքային կետերը:

Անդրադառնալով տարածաշրջանային առաջնահերթություններին՝ Կալլասը բացահայտել է պոտենցիալ զգալի փոփոխություն Սիրիայի նկատմամբ ԵՄ-ի մոտեցումներում: Միությունը դիտարկում է Սիրիայի նոր վարչակազմի նկատմամբ պատժամիջոցների չափավոր թուլացման հնարավորությունը՝ պայմանավորված ակնհայտ առաջընթացով:

«Մենք զգուշավոր լավատես ենք և պատրաստ ենք քննարկել պատժամիջոցների չեղարկումը, բայց դա պետք է անել քայլ առ քայլ մոտեցմամբ»,- ասել է Կալլասը՝ հավելելով, որ կոնկրետ միջոցառումները կքննարկվեն հունվարի 27-ին կայանալիք Արտաքին հարաբերությունների խորհրդի նիստում:

Կալլասն անդրադարձել է նաև Գազայում տիրող իրավիճակին, որտեղ ԵՄ-ն ավելացրել է մարդասիրական օգնությունը՝ միաժամանակ պահպանելով դիվանագիտական ​​հարաբերություններն ինչպես Իսրայելի, այնպես էլ Պաղեստինի իշխանությունների հետ: Նա ընդգծել է ԵՄ-ի հանձնառությունը խնդիրը երկու պետությունների ձևաչափով լուծմանը՝ հայտարարելով ինչպես ԵՄ-Իսրայել Ասոցացման խորհրդի նիստի, այնպես էլ Պաղեստինի ինքնավարության հետ բարձր մակարդակի քաղաքական երկխոսության պլանների մասին:

Ուկրաինայի հակամարտության վերաբերյալ ԵՄ դիվանագիտության ղեկավարն ընդգծել է Թուրքիայի եզակի դերը խաղաղության ջանքերի վրա ազդելու հարցում, մասնավորապես, Ռուսաստանի նկատմամբ։

«Թուրքիան շատ կարևոր դեր ունի Ռուսաստանի վրա ճնշում գործադրելու հարցում՝ տեղում խաղաղություն հաստատելու համար»,- ասել է նա՝ նշելով հակամարտությունը դադարեցնելու համար համակարգված միջազգային ճնշման անհրաժեշտությունը։

Ըստ Կալլասի՝ խաղաղության կարելի է հասնել, եթե «Ռուսաստանը դադարեցնի ռմբակոծել Ուկրաինան, մարդկանց, քաղաքացիական ենթակառուցվածքները և դուրս բերի իր զորքերը»։

Ինչ վերաբերում է ԱՄՆ-ում Դոնալդ Թրամփի նախագահության երկրորդ ժամկետին, Կալլասն ընդգծել է անվտանգության, պաշտպանության և տնտեսական հարցերի շուրջ ամուր անդրատլանտյան համագործակցության պահպանման կարևորությունը:

«ԱՄՆ-ը և Եվրամիությունը խոշոր առևտրային գործընկերներ են։ Մեր տնտեսությունները շատ փոխկապակցված են»,- նշել է նա՝ միաժամանակ ընդգծելով Ուկրաինային աջակցելու շարունակական կարևորությունը։

Կալլասն ասել է, որ Չինաստանի վերաբերյալ ԱՄՆ-ի մտահոգությունները չպետք է ստվերեն Ուկրաինայում Ռուսաստանի գործողություններից բխող անմիջական սպառնալիքը:

Թարգմանությունը՝ Էմմա Չոբանյանի