Պուտինն ու Սի Ցզինպինը տեսակապով բանակցություններ են անցկացրել

Չինաստանի Ժողովրդական Հանրապետության նախագահ Սի Ցզինպինը տեսակապով բանակցություններ է անցկացրել ՌԴ նախագահ Վլադիմիր Պուտինի հետ, հայտնում է Xinhua-ն, որին վկայակոչում է ՌԲԿ-ն։

Բանակցությունների մասին հայտնել են նաև Կրեմլից՝ հրապարակելով  զրույցի մեկնարկի կադրերը, որոնցում Պուտինը ձեռքը թափահարում է՝ ի նշան Սի Ցզինպինի ողջույնի։

Զրույցի սկզբում Պուտինը նշել է, որ տարեսկզբին Չինաստանի և Ռուսաստանի ղեկավարների բանակցությունները ավանդույթ են դարձել։ Նա ասել է, որ ռուսական կողմը մտադիր է ամփոփել անցած ժամանակահատվածում կատարված աշխատանքները և նախանշել ռուս-չինական գործընկերության և ռազմավարական փոխգործակցության զարգացման նոր ծրագրեր։

Նա նաև խոսել է Մոսկվայի և Պեկինի տեսակետների համընկնման մասին այն հարցում, թե «ինչպիսին պետք է լինեն հարաբերությունները խոշոր տերությունների միջև»։

«Ռուսաստանի ու Չինաստանի համատեղ աշխատանքը օբյեկտիվորեն կարևոր կայունացնող դերակատարում ունի միջազգային հարցերում»,-ասել է Պուտինը՝ նշելով, երկու երկրների միջև ապրանքաշրջանառության աճը՝ «չնայած դրսի բացասական ազդեցությանը»։ Նրա խոսքով՝ 2024 թվականի 11 ամիսների ընթացքում այս ցուցանիշն աճել է ավելի քան 7%-ով և գերազանցել 220 մլրդ դոլարը։

«Ըստ չինական վիճակագրության՝  ամբողջ տարվա ընթացքում այն ​​կազմել է գրեթե 245 մլրդ դոլար։ Չինաստանը մեր հիմնական առևտրային գործընկերն է, և Ռուսաստանը վստահորեն արդեն զբաղեցնում է հինգերորդ տեղը Չինաստանի առևտրային գործընկերների ցանկում», – հայտարարել  է Պուտինը։

Վերջին անգամ երկու երկրների ղեկավարները խոսել էին հոկտեմբերին Կազանում ԲՐԻԿՍ-ի գագաթնաժողովում:

Ուշագրավ է, որ այս բանակցությունները տեղի են ունենում Դոնալդ Թրամփի՝ ԱՄՆ նախագահի պաշտոնը ստանձնելուց ժամեր անց։

Թարգմանությունը՝ Էմմա Չոբանյանի