10.08.2026 | 10:56
Ռուսական զորքերն ավիառումբերով հարվածել են Սումիին․ վիրավորներ կան
«Ձեր նախագահության օրոք մեր հարաբերություններն ավելի կամրապնդվեն»․ Ալիևը շնորհավորել է Թրամփին
Քաղաքականություն
21.01.2025 | 20:46
Ադրբեջանի նախագահ Իլհամ Ալիևը շնորհավորական նամակ է հղել ԱՄՆ նախագահի պաշտոնը ստանձնած Դոնալդ Թրամփին։
Ադրբեջանական լրատվամիջոցների փոխանցմամբ՝ նամակում Ալիևը «իր ամենաանկեղծ շնորհավորանքներն է հայտնել Ամերիկայի Միացյալ Նահանգների 47-րդ նախագահի պաշտոնը ստանձնելու կապակցությամբ և մաղթել հաջողություն ապագա պատասխանատու բարձր մակարդակի գործունեության մեջ՝ ի շահ բարեկամ ամերիկյան ժողովրդի»:
«Վստահ եմ, որ Ձեր հետագա գործունեությունը կարևոր դեր կխաղա աշխարհում խաղաղության հաստատման և միջազգային անվտանգության ամրապնդման գործում։ Ադրբեջանը և Միացյալ Նահանգները միշտ սերտորեն համագործակցել են գլոբալ մարտահրավերների և սպառնալիքների, միջազգային ահաբեկչության և դրա տարբեր դրսևորումների դեմ պայքարում՝ ելնելով իրենց ազգային անվտանգության շահերից»,-նշել է Ալիևը՝ բարձր գնահատելով համագործակցությունը էներգետիկ ոլորտում, որը ծառայում է ԱՄՆ դաշնակիցների էներգետիկ անվտանգության ապահովմանը և հիմնված է լավ ավանդույթների և ամուր հիմքերի վրա։ Նա ընդգծել է Թրամփի մշտական աջակցությունը Ադրբեջանի էներգետիկ քաղաքականությանը։
«Մենք մտադիր ենք շարունակել մեր ակտիվ և արդյունավետ համատեղ աշխատանքը Միացյալ Նահանգների հետ՝ հիմնված փոխադարձ վստահության վրա, ինչպես ավանդական, այնպես էլ նոր համագործակցության ոլորտներում, և սերտորեն համագործակցել Ձեզ հետ այդ ոլորտներում: Հավատում եմ, որ Ձեր նոր նախագահության ընթացքում Ադրբեջանի Հանրապետության և Ամերիկայի Միացյալ Նահանգների միջև բարեկամական և գործընկերային հարաբերություններն էլ ավելի կամրապնդվեն և նոր բովանդակություն կստանան»,-հայտարարել է Ադրբեջանի նախագահը։
Թարգմանությունը՝ Էմմա Չոբանյանի
