02.04.2026 | 13:33
«Բոլորին դեմ եմ» շարժումն ու Նժար սահմանադրական շարժումը միավորվում են
Բաքվում պահվող Արցախի ղեկավարների շինծու գործերով հաջորդ դատական նիստերը տեղի կունենան հունվարի 21-ին և 27-ին․ ԼՈՒՍԱՆԿԱՐՆԵՐ
Քաղաքականություն
17.01.2025 | 22:14
Բաքվի դատարանում այսօր տեղի է ունեցել Ադրբեջանում ապօրինի պահվող Արցախի ռազմաքաղաքական ղեկավարների և պաշտոնյաների դեմ հարուցված շինծու գործերով առաջին դատական նիստը։ Ադրբեջանական լրատվամիջոցների հաղորդմամբ՝ Բաքվի զինվորական դատարանում, դատավոր Զեյնալ Աղաևի նախագահությամբ, դատավորներ Ջամալ Ռամազանովի և Անար Ռզաևի կազմով դատական նիստում, իբր, տրամադրվել են հայերենի թարգմանիչներ և փաստաբաններ։ Հաղորդվում է, որ ամբաստանյալների իրավունքներն ու պարտականությունները նրանց բացատրվել են հայերենով։
Նշվում է, թե քրեական գործով անցնում է 531.000 տուժած, ինչպես նաև նրանց ներկայացուցիչները։ Դատական նիստը հետաձգվել է մինչև հունվարի 21-ը։
Արցախի նախկին պետնախարար Ռուբեն Վարդանյանի շինծու քրգործն առանձին է քննվել։ Վարդանյանն ու նրա փաստաբանը, որը պայմանագրային հիմունքներով իրավաբանական օգնություն է ցուցաբերում, երկու միջնորդություն են ներկայացրել։ Մեկը վերաբերվել է նրան, որ նրա դեմ հարուցված շինծու քրգործը միացվի Արցախի մյուս 15 ղեկավարների ու պաշտոնյաների գործին, որը դատարանը մերժել է։
Հաջորդ միջնորդությունը վերաբերել է մեղադրական նյութերին ծանոթանալու համար լրացուցիչ ժամանակ տրամադրելուն։
Դատարանը որոշել է բավարարել միջնորդությունը, փաստաբանին տրվել է լրացուցիչ 10 օր՝ գործի նյութերը ուսումնասիրելու համար։
Հաջորդ դատական նիստը կշարունակվի հունվարի 27-ին։
Ադրբեջանական լրատվամիջոցներն այսօր տեղի ունեցած դատական նիստից լուսանկարներ են հրապարակել։
Թարգմանությունը՝ Էմմա Չոբանյանի
