09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
Ստամբուլում կեղծ ալկոհոլից զոհերի թիվը հասել է 38-ի
Քաղաքականություն
17.01.2025 | 23:29
Ստամբուլում կեղծ ոգելից խմիչք օգտագործելու հետևանքով մահացությունների թիվը վերջին չորս օրվա ընթացքում հասել է 38-ի։ Տեղական իշխանությունների տեղեկացմամբ՝ Ստամբուլի ոստիկանական բաժանմունքը մի շարք գործողություններ է սկսել, որոնք ուղղված են ամբողջ քաղաքում կեղծ ալկոհոլի արտադրության ու վաճառքի դեմ, գրում է Turkiye Today-ը։
Նշվում է, որ գործողություններ են իրականացվել բազմաթիվ շրջաններում, այդ թվում՝ Սուլթանգազիում, Բաքըրքյոյում, Ֆաթիհում, Բեյքոզում, Քյուչուքչեքմեջեում, Քաթալչայում և Էսենյուրթում: Իրավապահներն առգրավել են 32,862 լիտր կեղծ սպիրտ, 227 լցոնված կեղծ շիշ, թորման ապարատ և այլ սարքավորումներ։
Գործողությունների ընթացքում ձերբակալվել է 9 կասկածյալ։ Երեք անձ դատախազի հրամանով ազատ է արձակվել, վեցի գործերն ուղարկվել են դատարան, իսկ երկուսը պաշտոնապես կալանավորվել են։
Միջադեպի մասին հայտնի դառնալուց ի վեր 83 մարդ Ստամբուլում դիմել է բժշկական օգնության մեթանոլի թունավորման համար, որոնցից 38-ը մահացել է:
31 հիվանդ շարունակում է մնալ վերակենդանացման բաժանմունքում, իսկ 18-ը բուժվում է սովորական բաժանմունքներում։ Իշխանությունները հաստատել են, որ հոսպիտալացվածներից 26-ն օտարերկրյա քաղաքացիներ են, մահացածների թվում կա Թուրքմենստանի յոթ քաղաքացի:
Ստամբուլի նահանգապետարանը հայտարարել է կեղծ ալկոհոլի արտադրության և տարածման դեմ պայքարի լրացուցիչ միջոցների մասին։ Հաղորդվում է, որ հունվարից առգրավվել է 29 տոննա կեղծ ալկոհոլ, իսկ ալկոհոլի անօրինական վաճառքով զբաղվող 64 ձեռնարկությունների լիցենզիաներն ուժը կորցրած են ճանաչվել։
Թարգմանությունը՝ Էմմա Չոբանյանի
