«Հարկախեղդ են անում»․ ինչքան են ավելանում փոքր բիզնեսի հարկերը․ ՏԵՍԱՆՅՈՒԹ

Էկոպայուսակների արտադրություն և վաճառք․ 2020 թվականին հիմնադրված ընկերության տնօրեն Հռիփսիմե Քոչարյանն ասում է՝ բացի փոքր բիզնես լինելուց՝ իրենք նաև սոցիալական խնդիր են լուծում։ 

ՍՊԸ-ն նախ աշխատել է որպես միկրոբիզնես, հետո 2023 թվականից անցել շրջանառության հարկի դաշտ։ Այս տարվա հունվարից շրջանառության հարկն աճել է։ Տնօրենի խոսքով՝ սա կբերի թանկացման, որոշ բիզնեսներ էլ կփակվեն։ 

Նշենք, որ այս տարվա հունվարից առևտրի սուբյեկտների համար հարկը սահմանվել է 10%՝ նախկին 5%-ի փոխարեն, արտադրության դեպքում՝ 7%՝ նախկին 3,5 %-ի փոխարեն, հանրային սննդի դեպքում՝ 12%՝ նախկին 6%-ի փոխարեն։ 

Հռիփսիմեն ասում է՝ շրջանառության հարկի բարձրացումը հերթական դժվարությունն է, որին բախվում է Հայաստանում գործող փոքր բիզնեսը։  Հարկ վճարելուց չեն խուսափում՝ վստահեցնում է Հռիփսիմե Քոչարյանը, պարզապես փոքր և միջին բիզնեսի ներկայացուցիչները չեն կարողանում երկարաժամկետ ռազմավարություն պլանավորել։ 

Շրջանառության հարկի դրույքաչափի բարձրացումը խնդիրներ է առաջացնելու հատկապես մարզերում, կարծում է տնտեսագետ Աղասի Թավադյանը։ 

Միկրոձեռնարկատիրության ցանկից դուրս կբերվեն և շրջանառության հարկի համակարգ կանցնեն մարզերում առևտրային գործունեությունը, վարսավիրական, մարմնի խնամքի, շոգեբաղնիքների գործունեությունը, ավտոմեքենաների տեխնիկական սպասարկման և վերանորոգման ծառայությունները, միջնորդական գործունեությունը՝ անշարժ գույքի վարձակալություն և վաճառք, ծրագրային ապահովման մշակման գործունեությունը և այլն։ Առանց սրա էլ փոքր բիզնեսի համար Հայաստանում աշխատելը հեշտ չէր՝ նշում է ոլորտի ներկայացուցիչը։  

Տնտեսագետի խոսքով՝ Հայաստանում հարկային համակարգն այնպիսին է, որ մաքուր աշխատելը ոչ մեկին ձեռնտու չէ։ 

Ուժի մեջ մտած փոփոխություններով փոքր և միջին բիզնեսին հնարավորություն է տրվում կրճատել հարկը, եթե նրանց ողջ շրջանառությունը փաստաթղթավորված լինի։ Տնտեսագետը նշում է՝ այդ փաստաթղթավորումը ոչ բոլոր դեպքերում է հնարավոր ներկայացնել։

Մանրամասները՝ տեսանյութում։ 

Անժելա Պողոսյան