06.10.2026 | 15:04
Ադրբեջանը հիմա էլ աղվանա-ուդիական համայնքի ներկայացուցիչների այց է կազմակերպել Արցախի Ծիծեռնավանք
Բաքվի դատարանն ադրբեջանցի ընդդիմադիր ակտիվիստին դատապարտեց 10 տարվա ազատազրկման
Քաղաքականություն
13.01.2025 | 16:32
Բաքվի ծանր հանցագործությունների դատարանն ադրբեջանցի հայտնի ակտիվիստ Բահթիյար Հաջիևին, որն արդեն ավելի քան երկու տարի կալանքի տակ է, դատապարտել է 10 տարվա ազատազրկման։ Ադրբեջանական լրատվամիջոցների հաղորդմամբ՝ դատարանը նաև որոշում է կայացրել բռնագրավել նրա բնակարանը և բանկային հաշիվներում առկա ֆինանսական միջոցները, իսկ ազատ արձակվելուց հետո՝ մեկ տարով արգելել զբաղվել ուսումնադաստիարակչական գործունեությամբ։
Պետական մեղադրողը պահանջել էր ակտիվիստին դատապարտել 11 տարվա ազատազրկման։
Ինքը՝ Հաջիևը, դատավճիռն անվանել է քաղաքականապես մոտիվացված և անհեթեթ։
Հաջիևն ուշադրություն է հրավիրել այն հանգամանքին, որ ինքը կալանավորվել է ՆԳՆ կազմակերպված հանցավորության դեմ պայքարի գլխավոր վարչության աշխատակցի նկատմամբ նպատակային պատժամիջոցներ կիրառելուց անմիջապես հետո։ Նա նաև երախտագիտություն է հայտնել իր ընտանիքին, լրագրողներին (հատկապես՝ ձերբակալվածներին) սատարելու համար, ինչպես նաև միջազգային կառույցներին՝ ԱՄՆ Պետքարտուղարությանը, Կոնգրեսի, ԵՄ-ին, ԵԽԽՎ-ին, Եվրոպայի խորհրդին և Եվրախորհրդարանին՝ աջակցության համար։
Դատարանում Հաջիևը միջնորդություն է ներկայացրել Միջազգային բանկում իր հաշվի վրա դրված արգելանքը վերացնելո վերաբերյալ։ Այդ հաշվի միջոցները փոխհատուցում են, որը վճարել է Ադրբեջանի կառավարությունը՝ Եվրոպական դատարանի որոշման հիման վրա։ Նա նշել է, որ իր ընտանիքի անդամները ֆինանսական դժվարություններ ունեն կալանավայրում իրեն սնունդ և այլ պարագաներ բերելու հարցում։ Դատարանը, սակայն, մերժել է միջնորդությունը։
Հիշեցնենք, որ Հաջիևը ձերբակալվել էր 2022 թվականի դեկտեմբերի 9-ին՝ «խուլիգանության» և «դատարանի նկատմամբ արհամարհանքի» մեղադրանքով։ Այնուհետև նրան այլ մեղադրանքներ են առաջադրվել ֆինանսական նոր խախտումների՝ դրամաշնորհների յուրացման, ապօրինի ձեռնարկատիրության, փողերի լվացման, մաքսանենգության և կեղծ փաստաթղթեր օգտագործելու, հարկերից խուսափելու համար։
Հաջիևը չի ընդունում իրեն առաջադրված մեղադրաները՝ պնդելով, որ իրեն կալանավորել են ներքին գործերի նախարար Վիլայաթ Էյվազովի հրամանով, վերջինիս հասցեին իր կողմից հնչեցրած սուր քննադատությունների համար։
Հավելենք, որ ԱՄՆ Պետքարտուղարությունը, ամերիկացի մի շարք կոնգրեսականներ, նույնիսկ նախկին պետքարտուղար Հիլարի Քլինթոնը, ԵՄ-ն ու եվրոպական, միջազգային տարբեր կառույցներ բազմիցս կոչ են արել Ադրբեջանի իշխանություններին ազատ արձակել Հաջիևին, ինչպես նաև մյուս քաղբանտարկյալներին։
Թարգմանությունը՝ Էմմա Չոբանյանի
