Քաղաքականություն
09.01.2025 | 11:20
Ջո Բայդենը չեղարկել է ԱՄՆ նախագահի պաշտոնում իր վերջին արտասահմանյան այցը Իտալիա՝ Կալիֆորնիայում զանգվածային հրդեհների պատճառով, որտեղ արդեն առնվազն 5 մարդ է մահացել։ Այս մասին հայտնել է Սպիտակ տան մամուլի քարտուղար Կարին Ժան-Պիերը, գրում է Current time-ը։
Ավելի վաղ Բայդենը նահանգում աղետի ռեժիմ էր հայտարարել՝ արտակարգ իրավիճակի հետևանքների դեմ պայքարելու և տուժածներին դաշնային օգնությունն արագացնելու նպատակով։
«Մենք պատրաստ ենք անել ամենը, ինչ պահանջվում է ՝ հրդեհները Հարավային Կալիֆորնիայում զսպելու և վերականգնմանը օգնելու համար: Բայց մենք գիտենք, որ դա երկար, անիծյալ երկար ճանապարհ է լինելու: Դաշնային կառավարությունն այստեղ է մնալու այնքան ժամանակ, քանի դեռ դուք մեր կարիքն ունեք»,- ասել է ԱՄՆ նախագահը։
Հունվարի 8-ին Բայդենը մեկնել է Լոս Անջելես՝ տեղեկություն ստանալու Կալիֆորնիայի նահանգապետից, իսկ Վաշինգտոն վերադառնալուց հետո որոշել է չեղարկել իր արտասահմանյան հրաժեշտի ուղևորությունը։
Նախատեսվում էր, որ Բայդենը հունվարի 9-ին կայցելի Իտալիա։ Եռօրյա այցի ընթացքում նա պետք է հանդիպեր երկրի նախագահ Սերջիո Մատարելլայի և վարչապետ Ջորջիա Մելոնիի հետ՝ քննարկելու Կիևին G7-ից 50 միլիարդ դոլարի վարկի հարցը՝ օգտագործելով ռուսական սառեցված ակտիվներից ստացված եկամուտները: Բացի այդ, ուղևորության շրջանակում նախատեսվում էր Բայդենի հանդիպումը Հռոմի Ֆրանցիսկոս պապի հետ։
Հավելենք, որ անտառային հրդեները Կալիֆորնիայում շարունակվում են հունվարի 7-ից։ Սա համարվում է նահանգի պատմության ամենաավերիչ հրդեհներից մեկը։ Իրավիճակը սրում են ուժեղ քամին և ցածր խոնավությունը։
Հաստատվել է 5 մարդու մահը, իսկ ավելի քան երկու հազար տներ, ձեռնարկություններ և այլ շինություններ ավերվել կամ վնասվել են: Տարհանվել է շուրջ 130 հազար մարդ։ Ըստ AccuWeather-ի գնահատականների՝ հրդեհի վնասը գերազանցելու է 50 միլիարդ դոլարը:
Թարգմանությունը՝ Էմմա Չոբանյանի
