09.01.2025 | 10:12
Փրկարարներն արգելափակումից ավտոմեքենաներ են դուրս բերել
Արգիշտի Ղազարյանը հրաժարականի դիմում է ներկայացրել Վարչական դատարանի նախագահի պաշտոնից
Հասարակություն
08.01.2025 | 18:12
Դատավոր Արգիշտի Ղազարյանի լիազորությունները՝ որպես Վարչական դատարանի նախագահ, դադարել են։ Այս մասին տեղեկանում ենք Բարձրագույն դատական խորհրդի կայքից։ Ըստ կայքում առկա տեղեկատվության՝ դատավորն է հրաժարականի դիմում ներկայացրել, իսկ թե որն է պատճառը, մեզ հայտնի չէ։
Այսպիսով՝ Ղազարյանը կշարունակի պաշտոնավարել որպես վարչական դատարանի դատավոր, իսկ դատարանի նախագահի պաշտոնը համարվում է թափուր։
Նշենք, որ Արգիշտի Ղազարյանը Վարչական դատարանի նախագահ էր նշանակվել 2023 թվականին ԲԴԽ նախկին նախագահ Կարեն Անդրեասյանի պաշտոնավարման շրջանում։ Նրա վերաբերյալ վերջին մոտ մեկ տարվա ընթացքում երկու կարգապահական վարույթ է հարուցվել։ Դրանցից մեկը Դատավորների Էթիկայի և կարգապահական հարցերի հանձնաժողովում, այսինքն՝ դեռևս ԲԴԽ չհասած կարճվել է։
Մյուս վարույթը հարուցվել է ՄԻԵԴ վճռի հիմքով։ Ըստ այս գործի՝ վարչական դատարանի քննությանը ենթակա գործը Հայաստանի Վարչական դատարանը և ոչ մի այլ ատյանի դատարան վարույթ չէր ընդունել, այսպիսով՝ Հայաստանը խախտել էր դատարանի մատչելիության իրավունքը։ Այն գործով, որով Ղազարյանը կանգնել էր ԲԴԽ-ի առաջ, անցնում էր նաև ԲԴԽ նախագահ Կարեն Անդրեասյանի սանիկ Քրիստինե Մկոյանը։ Կարգապահական գործով անցնող բոլոր 4 դատավորներին ԲԴԽ-ն նկատողություն հայտարարեց՝ չնայած նույն իրավունքի խախտման համար ավելի վաղ դադարեցրել էր երեք այլ դատավորի լիազորություն։
Արաքս Մամուլյան
