13.01.2026 | 23:28
ՆԳՆ շրջիկ սպասարկման գրասենյակները ծառայություններ կմատուցեն Գեղարքունիքի և Վայոց ձորի մարզերում
Կառավարությունը ռիելթորական ծառայությունների ոլորտում կներդնի պարտադիր լիցենզավորման համակարգ
Տնտեսություն
04.01.2025 | 12:50
Կառավարությունը նպատակ ունի կարգավորելու ռիելթորական գործունեության ոլորտը։
E-draft նախագծերի միասնական կայքում հրապարակված «Ռիելթորական գործունեության մասին» օրենքի և հարակից այլ օրենսդրական փաթեթների ընդունման անհրաժեշտությունը հիմնավորվում է ոլորտի արդի խնդիրներով և միջազգային փորձի համեմատական վերլուծությամբ։
Հայաստանում ռիելթորական գործունեությունը ներկայումս իրականացվում է առանց օրենսդրական կարգավորման, ինչը հանգեցրել է մի շարք խնդիրների, մասնավորապես՝ ոլորտում բացակայում են պարտադիր որակավորման չափանիշները և էթիկայի կանոնները, ինչը նվազեցրել է մատուցվող ծառայությունների մակարդակը: Ծառայությունների ոչ պատշաճ որակը նվազեցրել է հասարակության վստահությունը ոլորտի նկատմամբ, անհատ միջնորդները հիմնականում գործում են հարկման դաշտից դուրս՝ խաթարելով պետական բյուջեի եկամուտների ավելացման հնարավորությունները։
Նախագծի հիմնական նպատակներն են կարգավորել ռիելթորական ծառայությունների մատուցման գործընթացը, սահմանել մասնագիտական և էթիկական չափանիշներ, ապահովել ծառայությունների որակի բարձրացում և ստվերից դուրս գալու հնարավորություն, ներդնել միասնական տեղեկատվական բազա՝ տվյալների հասանելիության և թափանցիկության ապահովման համար։
Նախագծի մշակման ընթացքում ուսումնասիրվել են մի շարք երկրների փորձեր. Կանադաում և ԱՄՆ-ում կարգավորումը հիմնված է ազգային ասոցիացիաների և բազմակի ցուցակագրման (MLS) համակարգի վրա, Ֆրանսիայում և Գերմանիայում գործում են խիստ կարգավորումներ, ներառյալ պարտադիր լիցենզավորում և ապահովագրություն, Ռուսաստանում և Ուկրաինայում ներդրված են որակավորման համակարգեր և կամավոր ինքնակարգավորվող մեխանիզմներ։
Նախատեսվում է սահմանել որակավորման և վերապատրաստման պահանջներ, կներդրվի պարտադիր լիցենզավորման համակարգ, որը վերահսկվելու է լիազոր մարմնի կողմից, կստեղծվի միասնական տեղեկատվական համակարգ, որը հնարավորություն կտա վերահսկելու գործարքների ամբողջականությունը։ Նախատեսվում է նաև ոլորտի սուբյեկտների գործունեությունը հարկման դաշտ տեղափոխելու մեխանիզմներ։
Օրենքի ընդունման արդյունքում ակնկալվում է ռիելթորական ծառայությունների որակի էական բարձրացում հասարակության վստահության վերականգնում ոլորտի նկատմամբ, ստվերային հատվածի նվազեցում և պետական բյուջեի եկամուտների ավելացում, մասնագիտական մակարդակի բարելավում և ռիելթորների գործունեության թափանցիկության ապահովում, թվային գործիքների և միասնական տեղեկատվական համակարգի կիրառման միջոցով ծառայությունների արդյունավետության բարձրացում։
