Քաղաքականություն
30.12.2024 | 14:02
Սիրիայի նոր ղեկավար Ահմեդ ալ-Շարաան հայտարարել է, որ մտադիր չէ ամբողջությամբ խզել հարաբերությունները Ռուսաստանի հետ և խոստացել է չորս տարվա ընթացքում երկրում ընտրություններ անցկացնել։ Նա նաև հայտարարել է իր գլխավորած զինված խմբավորումը՝ «Հայաթ Թահրիր ալ-Շամ»-ը (HTS) ցրելու մտադրության մասին, գրում է BBC-ի ռուսական ծառայությունը։
«Ռուսաստանը կարևոր երկիր է և համարվում է հզորությամբ երկրորդն աշխարհում»,- ասել է ալ-Շարաան Սաուդյան Արաբիայի պետական հեռուստաալիքին տված հարցազրույցում։
Սիրիայի ղեկավարը հավելել է, որ Ռուսաստանին և Սիրիային կապում են ընդհանուր ռազմավարական շահերը։
«Սիրիական բոլոր զենքերը ռուսական ծագում ունեն, շատ էլեկտրակայաններ ղեկավարվում են ռուս փորձագետների կողմից: Մենք չենք ցանկանում, որ Ռուսաստանը հեռանա Սիրիայից այնպես, ինչպես որոշ մարդիկ են ցանկանում»,- նշել է ալ-Շարաան։
Ավելի վաղ ՌԴ ԱԳ նախարար Սերգեյ Լավրովը ՌԻԱ Նովոստի լրատվական գործակալությանը տված հարցազրույցում ասել էր, որ ռուսական բազաների ճակատագիրը կարող է դառնալ Սիրիայի նոր իշխանությունների հետ բանակցությունների առարկա։
HTS-ի առաջնորդը, որը նախկինում հայտնի էր որպես Աբու Մուհամմեդ ալ-Ջուլանի, իշխանության գալուց հետո առաջին անգամ հայտարարել է, թե երբ կարող են Սիրիայում ընտրություններ անցկացնել։
«Ընտրական գործընթացը կարող է տևել չորս տարի»,- նշել է նա՝ հավելելով, որ քվեարկություն կազմակերպելու համար դեռևս անհրաժեշտ է վերականգնել իրավական համակարգը և իրականացնել Սիրիայի բնակչության ամբողջական մարդահամար։
Երկրի նոր սահմանադրության ստեղծումն էլ, ըստ նրա, կարող է տևել մինչև երեք տարի, և նոր իշխանություններին կպահանջվի շուրջ մեկ տարի՝ կառավարական ինստիտուտների գործունեությունը զգալիորեն բարելավելու համար:
Սիրիայի նոր ղեկավարի խոսքով՝ իր խումբը «կլուծարվի» ապագա համաժողովում, որտեղ երկխոսություն կսկսվի սիրիական հասարակության տարբեր շերտերի միջև։ Նա չի հստակեցրել, թե կոնկրետ ինչ է դա նշանակում կամ ինչպես է տեղի ունենալու լուծարումը։
Թարգմանությունը՝ Էմմա Չոբանյանի
