26.05.2026 | 12:35
Գեղակերտում հավաքի մասնակցելու դիմաց 15 հազար դրամ են բաժանել․ ՆԳՆ
«Օբորոնլոգիստիկա»-ն պնդում է, որ «նպատակային ահաբեկչություն» է իրականացվել Միջերկրական ծովում խորտակված Ursa Major նավի վրա
Քաղաքականություն
26.12.2024 | 14:24
ՌԴ Պաշտպանության նախարարության «Օբորոնլոգիստիկա» ձեռնարկությունը հայտարարել է, որ Միջերկրական ծովում խորտակված Ursa Major նավը «նպատակային ահաբեկչության» թիրախ է դարձել։ Այս մասին հայտնում է «ՌԻԱ Նովոստին»՝ կազմակերպությանը հղումով։
«Օբորոնլոգիստիկա»-ն ներկայանում է որպես Ursa Major բեռնատար նավի օպերատոր։ Անձնակազմի անդամները պնդում են, որ Մոսկվայի ժամանակով 13:50-ին «երեք իրար հաջորդող պայթյուն է տեղի ունեցել», ինչի հետևանքով նավն աջակողմյան հատվածում կողաթեքվածք է ունեցել մինչև 25 աստիճան։ Ընկերությունը չի հստակեցրել, թե կոնկրետ ով կարող էր Միջերկրական ծովում նավի վրա ահաբեկչություն իրականացնել և ինչպես կարող էր դա տեղի ունենալ։ Պայթյունից հետո նավը խորտակվել է, երկու մարդ մահացել է, 14 մարդ փրկվել է։
Լրատվամիջոցները հայտնել էին, որ պայթյունը տեղի է ունեցել շարժիչային սրահում, երբ Ursa Major-ը շարժվում էր դեպի արևելք՝ Ջիբրալթարի նեղուց։ Նավը Սանկտ Պետերբուրգից մեկնել է դեկտեմբերի 11-ին և պետք է ժամաներ Վլադիվոստոկ հունվարի 22-ին։
Mediazona-ն էլ գրել է, որ «Sparta» և «Ursa Major» նավերը երկար տարիներ բեռներ էին տեղափոխում Սիրիայում ռուսական զորախմբի համար։ Լրատվականի պնդմամբ՝ խորտակված Ursa Major-ը տեղափոխում էր ռեակտորի լյուկեր, որոնք նախատեսվում էր հասցնել Վլադիվոստոկ և տեղադրել Lider միջուկային սառցահատի վրա։
Թարգմանությունը՝ Տաթև Ֆռանգյանի
