Գերմանիան կոչ է անում Թուրքիային հետաքննել թուրքական ԱԹՍ-ի հարվածից քուրդ լրագրողների մահը

Գերմանիայի լրագրողների ասոցիացիան (DJV) կոչ է արել Թուրքիայի կառավարությանը պարզաբանել Սիրիայի հյուսիսում թուրքական անօդաչու թռչող սարքի հարձակման հետևանքով երկու քուրդ լրագրողների մահվան հանգամանքները, գրում է Stockholm Center for Freedom-ը։

32-ամյա Նազիմ Դաշտանը և 29-ամյա Ջիհան Բիլգինը սպանվել են դեկտեմբերի 19-ին Հալեպի արևելքում գտնվող Տիշրին ամբարտակի մոտ՝ Անկարայի կողմից աջակցվող ուժերի և ԱՄՆ-ի կողմից աջակցվող քուրդ զինյալների միջև բախումները լուսաբանելիս։

Չնայած մի քանի լրատվամիջոցներ Թուրքիային մեղադրում են զինված անօդաչու թռչող սարքի կողմից լրագրողների դիտավորյալ սպանության մեջ՝ Անկարան լռում է այս մեղադրանքների վերաբերյալ։

Ըստ DJV-ի հայտարարության՝ երկու լրագրողներն էլ երկար տարիներ աշխատել են քրդական լրատվամիջոցներում և վերջերս լուսաբանել են Թուրքիայի կողմից աջակցվող Սիրիայի ազգային բանակի՝ ապստամբ խմբավորումների կոալիցիայի հարձակոմները Սիրիայի հյուսիսային և արևելյան քրդական տարածքների վրա։ Մեջբերվում են ականատեսների պնդումները, որ թուրքական անօդաչու թռչող սարքը դիտավորյալ թիրախավորել է լրագրողներին Սիրիայի Ռոժավայում։

«Սա տագնապալի մեղադրանք է, որը պետք է հետաքննի թուրքական կառավարությունը: Եթե թուրքական անվտանգության ուժերը թիրախավորում են լրագրողներին, մեղավորները պետք է պատասխանատվության ենթարկվեն»,- ասել է DJV-ի նախագահ Միկա Բոյսթերը:

Կոչ անելով դիվանագիտական աջակցություն ցուցաբերել Գերմանիայի արտաքին գործերի նախարարությանը՝ պատասխանատվություն պահանջելու համար, նա նշել է, որ եթե լրագրողների մահն ապացուցվի, դա պետք է ազդի Թուրքիայի հետ Գերմանիայի դիվանագիտական հարաբերությունների վրա:

Միաժամանակ, թուրքական իշխանությունները երկուշաբթի ձերբակալել են ինը հոգու, այդ թվում՝ մամուլի վեց ներկայացուցիչների, որոնք բողոքում էին շաբաթավերջին Ստամբուլի Շիշհանե հրապարակում լրագրողների սպանության դեմ։ Ստամբուլի գլխավոր դատախազությունը հետաքննություն է սկսել նաև Ստամբուլի փաստաբանների միության նախագահ Իբրահիմ Քաբօղլուի և կազմակերպության խորհրդի անդամների դեմ՝ կապված լրագրողների սպանությունից հետո հրապարակված մամուլի հայտարարության հետ։

Թարգմանությունը՝ Էմմա Չոբանյանի